Nobeda Edaletê ya xizmên girtiyên nexweş, bi armanca ku balê bikişînên ser rewşa girtiyan û şewitandina înfaza girtiyan li Baroya Amedê dabûn destpêkirin, di roja 7’emîn de berdewam dike. Hejmara malbatên girtiyên ên tev li çalakiyê bûn zêde bûn. Îro jî xwişka Yahya Fîdan ê li Girtîgeha Ewlehiya Bilind a Hejmara 2’yan Amedê dimîne, Yasemîn Kaya û dayika Mehmet Yildirim ê li Girtîgeha Tîpa T a Bafrayê dimîne, Hazal Yildirim tev li çalakiya nobetê bûn.
Serdanên çalakiya nobetê ya malbatan jî didomin. Îro endamên Kongreya Îslamê ya Demokratîk (KÎD) serdana malbatan kirin.
Endamê KÎD’ê Abdûlbarî Tiryakî di serdanê de axivî. Tiryakî diyar kir ku çalakiya ku malbatên girtiyan daye destpêkirin silav dikin û wiha got: “Rayedar dengê girtiyan nabihîzin û nabihîzin jî. Ya girîng ew e ku mirov li derve tiştekê bike. Di vî warî de çalakiya we di cih de ye. Divê herkes dengê berxwedana li vir bilind bike.” AMED
