Sereko Pêroyî yê Partîya Azadîye Ayetullah Aşitîyî Nobeta Demokrasîye ya Amedî de qisey kerd: “Ganî ma wayîrê rûmetê xo bivejîyê û heta ke ma îradeyê xo apey bigêrê ganî ma meydanan de bê.”
Nobeta Demokrasîye ya verba xespê qeyûmî roja 46ine de dewam kerde. Nobeta Demokrasîyî verê bînaya HDPyî ya Cehdeyê Lîseyî de ameye viraştene. Parlementerê Partîya Demokratîke ya Şaran (HDP), endamê Meclîsê Ciwanan û Meclîsê Cinîyan yê Azadan yê HDPyî, endamê Meclîsê Dayîkê Aştîye, aktîvîstê Tevgerê Cinîyanê Azadan (TJA) tewrê çalakîye bîyî. Stenbol ra endamê Federasyonê Komeleyê Başûrê Rojhelatî û Anatolîya paştî da çalakîye.
‘Seba ke ma ser bikewê…’
Serekê Pêroyî yê Partîya Azadîye Ayetullah Aşitîyî bale ante ayetanê Qur’anî ser û va: “Şarê Kurdî heqanê merdimîye ra ber çîyêk nêwazeno. Naye ra ganî ma wayîrê rûmetê xo bivejşyê. Seba ke ma ser bikewê ganî ma wayîrê îradeyê xo bivejîyê. Heta ke ma îradeyê xo apey bigêrê ganî ma meydanan de bê.”
Nobeta Demokrasîye dimayê eşkerayîyan pê çalakîya roniştişî qedîyaye. AMED
