Wekîlê Partîya Demokratîke ya Şaran (HDP) vera tecrîdkerdişê Rayberê Şarê Kurdî Abdullah Ocalanî ver bi Wezîrîya Edaletî rayîr a şîyî. Wekîlê HDPyî Gulistan Kiliç Koçyîgît, Abdullah Koç, Kemal Pekoz, Pero Dundar û Celadet Gaydali Berê Dîkmenî yê Meclîsî de ameyî astengkerdene.
Wekîla HDPyî Gulistan Kiliç Koçyîgîte dîyar kerd ke înan vera tecrîdê Îmraliyî 7 rojî yo Nobeta Edaletî kenê. Koçyîgîte vat: “21 mengî yo Birêz Ocalanî ra xeberêke çin a. Ma na bêhuqûqîye qebul nêkenê. Tecrîd goreyê pêro erjan û krîteranê mîyanneteweyîyan sûcê vera merdimatîye û îşkenceyî yo. Îmrali de rejîmêko taybet û îdamêko emrderg est o. Ganî Abdullah Ocalanî de pêvînayîş bêro kerdene. Heqê pêro tepişteyan o ke avûkatanê xo bivîno. Hemserekîya partîya ma, vervatoxa ma, Hemserekê DBPyî û wekîlanê ma seba pêvînayîşê bi Abdullah Ocalanî muracat kerdbi. Ganî Ocalan tewr nêbo avûkatan û keyeyê xo bivîno. Şarê kurdî rewşa ey ra qerqilîyeno. Ma reyna venga îqtîdarê AKPyî, Wezîrîya Edaletî danê. Ma na rewşa nêhuqûqîye qebul nêkenê. Heta ke birêz Ocalan bieşko pêvînayîş bikero ma do çalakîya xo rê dewam bikerê.” ANQARA
