Fermandariya Biryargeha Navenda Parastina Gel (NPG) ji fermandar û şervanên Pêngavên Şehîd Savaş Maraş û Cenga Xabûrê re peyama pîrozbahiyê şand. NPG’ê di peyama xwe de têkoşîna Gerîlayên Azadiya Kurdistanê silav kir û ji bo çalakiyên bi ruhê fedaî pêk tînin jî pîroz kir.
Fermandariyê di peyama xwe de ev tişt anî ziman: “Li dijî êrişên dagirkeriyê yên artêşa tirk a dagirker ên li ser Herêmên Parastinê yên Medyayê, Gerîlayên Azadiyê yên Kurdistanê bi taktîkên dewlemend û afirîner bersivê didin û derbên giran li dijmin dixin. Gerîlayên me yên bi rengê fedaî şer dikin, artêşa tirk a faşîst tengav kirine û planên wan ên dagirkeriyê xera kirine. Artêşa tirk a dagirker lewma li pey berfirehkirina qadên dagirkeriyê ketiye. Artêşa tirk a dagirker şeva 25’ê gulanê êrişên xwe li rojavayê Ava Zê û qada Metînayê berfireh kir. Hêzên me yên gerîla li dijî vê pêla nû ya êrişê ya dijmin, bi pêngavên şoreşgerî yên Şehîd Savaş Maraş û Cenga Xabûrê bersiveke bi bandor dan, di encamê de jî dagirkeran windahiyên giran dan. Kêliya ku artêşa tirk a dagirker gav avêt qadên berxwedanê yên Girê Hakkarî, Girê Cûdî û Girê FM’ê, tîmên me yên bi tevger ên bi profesyonel ku xwe bi ruhê fedaî yê Apoyî xurt kirine, li dijî hêzên dagirker rêze çalakiyên serketî lidar xistin.”
Di peyamê de işaret bi van xusûsan jî hate kirin: “Di 29’ê gulanê de li qada berxwedanê ya Girê Hakkarî, li dijî hêzên artêşa tirk a faşîst ên dixwestin ber bi çeperên şer ên Girê Şehîd Akîf ve bi pêş ve bên, tîmên me yên bi tevger ji 2 baskan ve çalakiyeke serketî ya êrişê lidar xistin. Di encama çalakiyê de çekeke MPT-55 a dijmin û gelek alavên leşkerî hatin desteserkirin. Ev çalakiya ku di encamê de dijmin windahiyên giran da, hostatiya taktîkê û ruhê êrişê yê bilind ê Gerîlayên Azadiyê yên Kurdistanê careke din nîşanî dost û dijminan da. Di vê çalakiya serketî de hevrêyê me Siyabend bi ruhekî bilind ê êrişê û rêbaza fedayî ya Apoyî bi ser dijmin ve çû, li refê herî pêş derba giran li dijmin xist, bi lehengî şer kir û şehîd bû. Di 30’ê gulanê de li dijî dijminê ku dixwest xwe bigihîne ser serê Girê FM, di çarçoveya Pêngava Şoreşgerî ya Şehîd Savaş Maraş de tîmên me yên bi tevger çalakiyeke êrişê ya serketî li dar xistin. Di encama vê çalakiyê de bi ser 10 cenazeyên dijmin ve çûn, 3 çekên MPT-55 û hin ji malzemeyên leşkerî hatin desteserkirin. Ruhê êrişê yê bilind û rêbaza lêdanê ya encamgir ku van tîmên me yên bi tevger nîşan dan, hêjayî pesindayinê ye. Di serî de tîmên me yên bi tevger ku li dijî hêzên dijmin ên dixwazin qadên me dagir bike bi performanseke serketî çalakiyên encamgir lidar dixin, em fermandar û şervanên ku tevlî van çalakiyan bûne hemûyan ji ber serketina wan pîroz dikin.”
Fermandariya NPG’ê di dawiay peyama xwe de ev tişt anî ziman: “Hevrêyên xwe yên ku ji roja destpêkê ya êrişên dagirkeriyê yên dijmin û pê ve bi wêrekî û biryardariyeke mezin şer kirin û şehîd bûn, bi rêzdarî û minetdarî bi bîr tînin, soz didin şehîdên xwe yên leheng ku em ê teqez bi ser bikevin. Em di wê baweriyê de ne ku pêngavên şoreşgerî yên Şehîd Savaş Maraş û Cenga Xabûrê wê ji niha û pê ve bi serketinên hîn mezintir dewam bikin. Hevrêyan hemûyan ku bi rengê fedaî şer dikin bi hezkirin û rêzdarî silav dikin û serketinê ji wan re dixwazin.”
