Nûçegîhana ajansa MA’yê Zeynep Dûrgût ku di 17’ê kanûnê de piştî şopandina nûçeyê li navçeya Cizîrê ya Şirnexê bi lêkişandina çekê hatibû binçavkirin û anîbûn Wanê, piştî îfadegirtina li Miduriyeta Polîsan a Wanê sewqî edliyeyê hat kirin. Piştî îfadegirtina li dozgeriyê Dûrgût bi îdiaya “xebatên li ser navê rêxistinê” bi daxwaza girtinê sewqî 2’yemîn Dadgeriya Cezaya Silhê ya Wanê hat kirin.
Di îfadedayîna dadgeriyê de, wêneyên nûçeyên ku çêkiriye ji Dûrgût hatin pirsîn. Dûrgût destnîşan kir ku wêneyên kişandiye yên çalakiya Tevgera Jinên Azad (TJA) in û bi armanca nûçeyan kişandiye û ev rewş ne mijara sûc e. Dîsa ji Dûrgût ragihandinên wê yên hin televîzyonan jî hatin pirsîn.
Parêzera Dûrgût, Ekîn Yeter diyar kir muwekîla wê bi awayekî bêhiqûqî hatiye binçavkirin û daxwaza berdana wê kir.
Bi şertê kontrola edlî hat berdan
Dadgehê diyar kir ku rewşa rev û reşkirina delîlan a Dûrgût tuneye û biryar da ku Dûrgût bi şertê kontrola edlî bê berdan.
Dê di çarçoveya tevdîra kontrola edlî de hefteyê 3 rojan îmze bide. WAN
