Komîteya Têkiliyên Giştî ya Rêveberiya Sivîl a Demokratîk a Tebqayê bi daxuyaniyekê diyar kir ku dewleta tirk tevî agirbestê jî li herêmê qirkirinê, paqijiya etnîkî û gelek sûcên şer dike. Komîteyê bang li Amerîka û Rûsyayê kir ku bi erkên xwe yên garantoriya agirbestê rabin
Komîteya Têkiliyên Giştî ya Rêveberiya Sivîl a Demokratîk a Tebqayê têkildarî êrîşên dewleta tirk û çeteyên wê yên li dijî rojavayê Kurdistanê daxuyaniyek da çapemeniyê. Di daxuyaniyê de ji ber binpêkirina agirbestê bang li Amerîka û Rûsyayê hate kirin.
Daxuyanî li pêşiya navenda Rêveberiya Sivîl a Tebqayê bi tevlêbûna endamên komîteyên rêveberiyê û hevserokatiya hat dayîn. Daxuyanî ji hêla hevserokê komîteyê Teysîr El Efat ve hate xwendin.
Di daxuyaniyê de hat gotin ku dewleta tirk qanûnên navdewletî binpê dike û li Bakur û Rojhilatê Sûriyeyê qirkirinan û paqijiya etnîkî dike. Di daxuyaniyê de qirkirinên dewleta tirk ên berê yên li dijî gel û mezheban hatin bibîrxistin û ev tişt hatin gotin: “Divê Amerîka û Rûsya ku bi dewleta tirk re peyman îmze kirin, li dijî sûcên şer ên dewleta tirk bisekinin.”
Herî dawî jî ev tişt hatin destnîşankirin: “Bi sedhezaran kes ji hêla hêzên dagirker ve hatin koçberkirin. Lê tevî vê yekê jî rêxistinên navdewletî bêdengin. Ji van rêxistinan hinekan jê karên xwe sekinandin. Em bang li hemû rojnamevan û dezgehên çapemeniyê dikin ku berê xwe bidin Bakur û Rojhilatê Sûriyeyê û sûcên şer ên li vir belge bikin.” TEBQA
