Hepsîya nêweşe Nurcane Bakir a ke seba ke teda û îşkenceyê zîndanan protesto bikero Zîndanê Balikesîrî de peynîya cuya xo arde dewa ci de ameye definkerdene
Hepsîya 28 serran Nurcane Bakir a badê grevê vêşanîye Zîndanê Cinîyan ê Gebze ra surgunê Zîndanê Balikesîrî bîye seba ke zextan protesto bikero peynîya cuya xo arde.
Keyeyê Bakire cenazaya kênaya xo Morgê Dezgehê Tibê Edlî (ATK) ya Bursa ra girewte berde dewa Hecîya ya qezaya Mehsertî ya Mêrdînî. Dekewtişê Mehsertî de konvoyê cenaza hetê polîsan ra ameye kontrolkerdene. Dekewitşê taxe de polîsan reyna konvoy vindarna her kes wesayîtan ra ard war û bi kutikan cigêrayîş kerd. Helê cigêrayîşî de polîsan bi vatişê ‘şima ameyî cenazaya leşe?’ heqaret kerd. Cinîyan taxa Sulakdere de cenaza bi slogana ‘Wa biciwîyo xoverdayîşê cinîyan’ û tîlîlîyan ermeyanê xo ser kirişte. Badê şitiş û caardişê vecîbeyanê dînîyan cenaza serê ermeyanê cinîyan de bi sloganan ameye berdene goristan.
Definkerdiş ra dima Parlamentera HDPyî ya Mêrdînî Perîhane Agaoglu wina qisey kerd: “Embeze Nurcane ewro ameye dewa ke tede bîya û herra ke hesretê ci antêne. Dimayê hendê têkoşînî herra ke semedê ci xo ver dayêne ameye tîya. Ewro ma heme vînenê ke Rojhelato Mîyanênî û Kurdistan de şarî rê senî zext yeno kerdene. Ewro ne ziwan, ne nasname ne zî merdimîye yeno naskerdene. Ma sey cinî sereyê ma berz o. Embaze Nurcane serranê xo yê qijan de dest pê têkoşînî kerd. Têkoşînê aye do ma rê bibo roşnayî. Ma do mîrasê aye bîgêrê û rêça aye de xoverdayîş xurt bikerê.”
Keyeyê Nurcane Bakir da zanayene ke ê do Adana de tezîye ronê.
