Birayê Rayberê Şarê Kurdî Abdullah Ocalanî, Mehmet Ocalanî qalê pêvînayîşê roşanî yê Ocalanî kerd
Birayê Rayberê Şarê Kurdî Abdullah Ocalanî, Mehmet Ocalanî Ajansê Mezopotamya (MA) rê qalê pêvînayîşê roşanî yê Ocalanî kerd.
Mehmet Ocalanî bale ante ke 20 serrî yo o şino Îmrali û şertê şîyayîşî yê na rey tewr çetin bî û va: “Ma 5 rey nuqtayanê kontrolî ra ravêrtî û tewirê înan ê vera ma xirab bi, çîyêko winayên nêno qebûlkerdene. Îmrali de ma kerdî cîya. Qismo verên de waya Veysî Aktaşî û birayê Omer Hayrîyî estbî. Keyeyê bînî gerîyaye odayanê cîya cîyayan ma zî heyat de ameyî têhet.”
Qiseykeridşê Mehmet Ocalanî yê pêvînayîş ra tayî cayî wina yê.
Ocalanî ard ziwan ke o şarê Şengalî ra zaf hes keno û va: “Semedê azadîya şarê Şengalî ma eşkenê qalê di babetan bikerê. Yewine Dewrêşê Evdî û a diyîne zî mucadeleyê embazanê ma yo. Şengal ra heta Reqa Êzidî ameyî qetilkerdene. La ma qesasê Êzidîyan girewt. No semed ra ma bikeyf ê. Ez şarê Şengalî rê hurmet û heskerdişê xo bêpeynî şawena.”
Ocalanî derheqê Vakurê Sûrîye de ercnayîşî kerdî û va: “Ganî semedê azadîya şarê Vakurê Sûrîye mucadele bêro xurtkerdene û heme şarê herême pêro pîya tê bigêro.”
Ocalanî ard ziwan ke çalakîyê grevê vêşanîye heta cayêk ê. Dima ra zirar danê her kesî. Coka ganî çalakîyê demokratîkî bêrê viraştene. Vera polîtîkaya qirkerdişê dewlete ganî xoverdayîş bêro xurtkerdene. Ganî hem PKK hem zî dewlete semedê çareserî bi tewiranê neweyan avêr şirê.
Ocalanî merdimanê demê grevê vêşanîye rê serweşîye waşte û va: “Nê mergan hem zirar da merdimanê înan hem zî ziraro gird da mi. No raşt nêyo. Sîyaset grevê vêşanîye ser o heta cayêk beno heta peynî nêbeno. 8 kesan peynîya cuya xo arde. Embazê ke zîndanan de xora şertanê çetinan de yê, tiya nêeşkene siyaset bikerê. Ê ke teber de yê ê eşkenê hîna zaf çî bikerê.”
Ocalanî ard ziwan ke bi mergan problemî nênê çareserkerdene û va: “Ez nêeşkena vajî ke kanalê pêvînayîşî temamî de ameyî akerdene. Ganî ma bine bipawê. Eke nê kanalî temamî de abî semedê her kesî hol beno. La eke bi qefilyê no semedê her kesî rijnayîş o.”
Ocalanî derheqê weçînayîşê Stenbolî de qisey nêkerd û roşanê her kesî bimbarek kerd. RIHA
