Rayberê PKKyî Abdullah Ocalan: “Ez wazena ke şima grevê vêşanîye û rojeyê mergî bi pêşnîyarê mi biqedînê; ez nê tewirê şimayo ke wayîrê muhîmî û manayêka tarîxîye yo sey ercêko berz vînena û spas kena.”
Avûkatê Baroya Huqûqî yê Çaxî Rezan Sarica û Neweroz Uysale 12ê Hezîrane de Îmrali de reya 3. muwekîlê xo Abdullah Ocalanî reyde pêvînayîş pê ardî. Buroyê Huqûqî yê Çaxî derheqê pêvînayîşî de eşkerayîyêka nuştekî weşênaye. Buroyê Huqûqî yê Çaxî sewbîna mesajê Abdullah Ocalanî yê kilm zî rayapêroyî reyde pare kerde.
Eşkerayîya Buroyê Huqûqî yê Çaxî de wina ameyî vatene:
“Ma sey Buroyê Huqûqî yê Çaxî 12ê Hezîrane roja Çarşemeyî de muwekîlê xo Birêz Abdullah Ocalanî reyde, ke Zîndanê Îmraliyî de yo, çarçewaya heqanê ci yê qanûnîyan de pêvînayîşêk kerd.
Pêvînayîşo ke Ocalanî reyde ame kerdene, înan de nê sernameyî vejîyayî vernî;
Ocalanî vat beno ke grevî bêrê kerdene, labelê ganî sey metodo bingeyên ê mucadeleyî nêrê tesdîqkerdene. Ocalanî pozîsyonê xo sey sîyasetê ciwînayîşî name kerd û vat çîyo ke esas o mucadeleyê ciwîyayîşî û ciwînayîşî yo.
Hetêna ra ard ziwan ke sey nêşaneyêkê tarîxkîyî bê tirkan kurdî nêbenê, bê kurdan zî tirkî nêbenê. Eke Mezopotamya de kurdî bêrê qedînayene, Anatolîya de zî do bi nameyê tirkîtî çîyêk nêmano.
Seba Surîye zî vat ke virazîyayîşê fehmê sîyasîyî yê yewîya Surîye muhîm o, pêşnîyarê xo yê derheqê demokrasîya cayîye ya ke bi qanûnî gîrîyaya binê garantî ard ziwan. Heman wextî de ard ziwan ke polîtîkayê zereyî-teberî yê Tirkîya-Surîye yewbînan rê pabeste yê û nêeşkenê yewbînan ra cîya bêrê ercnayene.
Ocalanî meseleya azadîya cinîyan ser o zî fikrê xo ardî ziwan û derheqê kişîyayîşê Ozgecane, veyvê domanî û têkilîyanê cinî-camêrdan de tayê ercnayîşî kerdî. Çinbîyayîşê sîyasetêk ke nê probleman hal bikero zî sey babetêka krîtîkkerdişî ya bingeyêne girewte xo dest.
Îlawe de tayê kitab û nuştoxan ser o ercnayîşî kerdî û ard ziwan ke o sosyalîzmî esas gêno, hemverê dogmatîzmî de awankerdişî xo rê esas gêno û na çarçewaye de hemverê fehmanê sosyalîstan ê reelan de yo û hemverê nê de xo rê ewnîyayîşê Rojakewtena Mîyanêne sey merkezê çareserîye gêno dest.
Rayapêroyîye rê bi rêz û silaman…“
Peyamê Ocalanî yê seba xoverdayoxanê Rojeyê Mergî û Grevê Vêşanîye
Embazê Ercayeyî;
Ez wazena ke şima grevê vêşanîye û rojeyê mergî bi pêşnîyarê mi biqedînê; ez nê tewirê şimayo ke wayîrê muhîmî û manayêka tarîxîye yo sey ercêko berz vînena û spas kena.
Xusûsen hemrayê ke prosesî bi xorînî ciwîyenê bi lez hetê bedenî ra, zihnî ra û ruhî ra ganî muqayetê xo bibê. Bingeyê dersanê ke prosesê krîtîk û xokrîtîkkerdişî de ameyê girewtene de ez serkewtiş wazena.
Ez xusûsen ana ziwan ke ganî no tewiro ke hetê însîyatîfê şexsîyî ra vejîya werte, sey tewir û tawîzêkê seba dewlete nêro ercnayene. Ez umîd û hîsanê xo ra bawer kena ke do netîceyêko pozîtîf bêro girewtene. Ez wazena ke şima tîya ra tepîya bi beden, ruh û zihînî felsefeya estbîyayîşî ser o aver şirê, silaman û heskerdişanê xo yê bêpeynîyan pêşkêş kena.”
Abdullah Ocalan
12 Hezîrane 2019
Zîndanê Îmrali / Bûrsa” STENBOL
