Odeyan Tabîbên ên li bakurê Kurdistanê bi daxuyaniyeke hevpar xwestin ku tecrîda li ser Ocalan bi dawî bibe û pêşî li mirinan bê girtin. Bijîşkan destnîşan kir ku rewşa gelek girtiyan di astekî krîtîk de ye û beriya ku mirin pêk bên, divê hikûmet di zûtirin dem de gavan biavêje
Odeyên Tabîban ên bakurê Kurdistanê li navçeya Tetwan a Bedlisê der barê çalakiya greva birçîbûnê û rojiya mirinê de daxuyaniyeke hevpar dan. Di daxuyaniyê de rêveber û endamên Odeyên Tabîban ên Bedlis, Agirî, Êlih, Amed, Mêrdîn, Mûş, Sêrt, Şirnex, Riha û Wan-Colemêrgê jî amade bûn. Daxuyanî ji hêla endama Odeya Tabîban a Bedlisê Dr. Duygu Ozdogan ve hate xwendin.
Daxuyaniya Odeyên Tabîban ên bakurê Kurdistanê wiha ye:
“Çalakiya greva birçîbûnê ku hevseroka KCD’ê Leyla Guven di 8’ê mijdara 2018’an de li dijî tecrîd/Îzolasyonê dest pê kir, niha li 90 girtîgehan bi tevlêbûna 3 hezar û 60 girtiyan berdewam dike. Çalakiya 320 kesen di grevê de 4, 5 û 6 meh li pey xwe hişt. 2 hezar û 840 girtî jî piştî 1’ê adara 2019’an ketine greva birçîbûnê ya bêdem û bêdorveger. Li girtîgehên cuda jî niha 30 girtî di rojiya mirinê de ne. Em wekî bijîşkan hemû girtiyên ku di greva birçîbûnê ya bêdem û bêdorveger de wekî rojiya mirinê qebûl dikin. Girtiyen ku diyar kirin dest bi rojiya mirinê kirine, em bi baldari diyar dikin ku pêwîste dîsa şekir, xwê, karbonat û vîtamîna B1 berdewam bikin.
Girti dixwazin ku dewlet û hikûmet hiqûq û zagonên xwe pêk bînin. Ji ber ku wezîre dadê û rayedarên din tu gav neavêtine û ji ber vê yekê li girtîgehan 7 girtiyan dawî li jiyana xwe anîn. Ji ber ku gav nehatine avêtin, parlamenter û hevseroka KCD’ê Leyla Guven û gelek girtiyên hatine berdan li malên xwe jî çalakiya xwe berdewam kirin. Konseya Navendî ya TTB û odeyên tabîban bi wezareta dadê û parêzerên girtiyan re hevdîtin kirin. Xwestin rojê 5 îskanên avê, 2 kevçiyên çayê xwê, 5 kevçiyên xwarinê şekir, kevçiyek jî şêranî karbonat û 500 mg vîtamîna B1 bidin girtiyan. Ev yek girîngiya jiyanî ye. Dîsa xwest ku heyetek serbixwe ya bijîşkan biçin çavdêrî bikin. Dîsa ji bijîşkên girtîgehê û rayedaran xwest ku li gorî Danezana Maltayê tevbigerin.
Em dixwazin berî her tiştî sedemên ku girtî ketine grevê ji holê bên rakirin û ji bo vê yekê hikûmet û dewlet hiqûq û qanûnên xwe pêk bîne. Em dixwazin îktîdara siyasî beriya her tiştî daxwazên girtiyan pêk bîne û gavan bavêje. Piştî greva dem dirêj û rojiya mirinê dibe ku mirov jiyana xwe ji dest bidin. Em wekî Odeyên Tabîban careke din dibêjin ku ji bo kes nemire û di bedena girtiyan de nexweşiyên mayînde çênebin, em jiyana mirovan esas digirin. Em beriya her tiştî tenduristî û jiyana mirovan dixin navenda her tiştî. Ji bo kes nemirin û zerar çênebin divê her kes bi hestiyar û berpirsiyar tev bigerin. Ji bo vê yekê jî divê her kes li çareseriyê bigerin û ji bo çareseriyê gavan bavêjin. Bêyî ku pir dereng bibe, em hevî dikin ku li şûna mirinê jiyan bi ser bikeve.” BEDLÎS
