Endamê Konseya Rayberdişî ya KCKyî Sabrî Okî Bernameyê Taybetî yê Stêrk TVyî de rojdem ercna.
Qiseykerdişê Okî ra tay noqtayê girîngî wina yê:
”Vera Rayber Apoyî 25 serrî yo tecrîd yeno caardene. CPT û dewleta tirke derheqê tecrîdî de pîya têgêrenê. Şarê kurdî de tehamul nêmendo. Ne ma ne zî şarê kurdî nê esîrkerdişî qebul nêkenê. Konferansê Hamburgî de zî xeylêk roşnvîran ard ziwan ke tecrîd nêno qebulkerdene. Dusseldorf de zî şarê ma pê rayraşîyayîşêkê pîlî azadîya Rayberîye waşte. Seba azadîya Rayber Apoyî çi bikewo milê ma, ma do bikerê. Hukmat û Wezîrîya Edaletî kenê ke tecrîd normalîze bikerê. La şarê ma pê ney nêxapîyeno.
Artêşa tirke ya îşxalkere ronîyayîşê PKKyî ra nata vana ‘Ma ê qedînayê, hê qedînenê.’ La zûran kena. Zap, Avaşin û Metîna de serrêke ra nata vera hêrişanê îşxalî xoverdayîşêko pîl est o. Wa her kes bizano ke gerîlayî hê vera artêşêka barbar şer de ya. No xoverdayîş 2015 ra nata 8 serrî yo bêmabêm dewam keno. Ma mîyanê nê şerî de kombîyayîşê xo yê Konseya Fermandarîye zî kerd û birê girîngî girewtî.
Şerê vera kurdan ra semed Tirkîya mîyanê krîzê ekonomîkî de ya. Dewleta tirke û hukmatê AKP-MHPyî bi mîlyonan lîrayan danê nê şerî. Erdogan pê propagandaya şovenîzmî nêverdeno ke çew hesabê nê şerî biperso. Xora kam qisey bikero zî erzîyeno zîndanî. Hetê bînî ra keyeyê Erdoganî mîyanê luksî de ciwîyeno. Her kes bizano ke nê şerî ra semed krîzo ekonomîk est o.
Weçînayîşê 14ê gulane zaf krîtîk ê. Îqtîdarê AKP-MHPyî 20 serran o bi bêexlaqî, bêusûlî û zulmî hêrişê kurdan, gerîlayan, hêzanê demokratîkan, têgêrayîşê azadîye û muxalafetî keno.Îqtîdarê AKP-MHPyî yê faşîstî heta nika vera şarê kurdî her tewir hêriş kerd la zaneno ke çinkerdişê şarê ma û gerîlayan mumkîn nîyo. Eqsê ci ma peynîya îqtîdarê 21 serrî arde. Eke no faşîzmê AKP-MHPyî bêro rijnayene Tirkîya û Kurdîstan de prosesêkê demokrasî do dest pêbikero. Eke nê weçînayîşan de no rejîm birijîyo no do bibo mîlad.
Xebatê weçînayîşî yê Îtîfaqê Kede û Demokrasî ganî bêmabên û xurtî ra bêrê kerdene. Wina aseno ke AKP-MHP peyê dek û dolaban de yê. Wa çew bi rehetî tênêgêro. Ganî Îtîfaqê Kede û Demokrasî xo biresno pêro beşanê komelî.
1ê Gulane Roşanê Kedkar û Karkeran o. Emser Vakurê Kurdîstanî û Tirkîya de 1ê Gulane do hîna bibo manadar. Weçînayîşî çend girîng ê, 1ê Gulane zî hende girîng o. 1ê Gulane tesîrê weçînayîşan do bikero. Pêro karker, kedkar, cinî, ciwan û hêzê demokrasî ganî 1ê Gulane sey roja xoverdayîşî pêşwazî bikerê û her ca de pê girseyan fîraz bikerê. Tewr tay kedkarî binê tesîrê faşîzmî de manenê. Coka ganî pêro kedkar û ciwanî bi qerardarî û moralî bi ruhê Denîzan 1ê Gulane fîraz bikerê.” BEHDÎNAN
