Lijneyek ji oldar, bawermed, rûspî û ilimdarên civaka Êzîdî serdana navenda YBŞ-YJŞ’ê kir. Bi navê fermandariya YBŞ-YJŞ Mazlûm Şengalî û Zerdeşt Şengalî pêşwaziya wan kirin.
Dema ku çeteyên DAÎŞ’ê êrîşî Şengalê kiribûn gelek deverên ku ji bo civaka Êzîdî pîroz bûn xirakiribûn û rûxandibûn. Li ser vê esasê jî ji aliyê YBŞ-YJŞ’ê ve bi taybetî ji bo çêkirina qadên pîroz alîkarî hatibû dayîn.
Heyeta ku hate bi fermandariyê re rûnişt, di derbarê karên ku di vî warî de tên meşandin axivî.
Ji fermandariya YBŞ-YJŞ Mazlûm Şengalî kêfxweşiya xwe anî ser ziman û got “Em gelekî kêfxweş bûn ku oldar, rûspî û ilimdarên civaka me hatine serdana şervanên xwe.”
Mazlum Şengalî diyar kir, “Çeteyên DAÎŞ’ê bi zanebûn êrîşî qadên pîroz kirin. Ji ber ku ev cih mejî, zanist, rastî, dîrok, çand û ehlakê civakê ne. Wan xwestin bi wan êrîşên xwe civaka me him bi fîzîkî him jî di bawerî, çandî û exlaqî de tine bikin. Em parêzvanên Êzdîxanê; YBŞ-YJŞ ji bo her cûre xizmeta civaka xwe amade ne. Çi çêkirina pîrozgehan be çi jî xizmetên cûda be çi ji destê me were emê bi zêdehî bikin.”
Endamên lijneyê jî yek bi yek axivîn û ji bo alîkarî û pêşwazîkirina wan a ji aliyê YBŞ-YJŞ ve spasiyên xwe raber kirin û gotin, “Em jî hazirin ku timî piştgiriya şervanên Êzîdxanê bikin.”
Lijne piştre çû serdana qûbeya Şêx Mehmed a ku ji aliyê DAÎŞ’ê ve hatibû xerakirin.
Bi navê heyetê Mam Faxira li wir axivî û got, “Em spasî ya şervanên axa pîroz dikin ku ew heta îro bi her rengî bûne alîkar.” Her wiha bang li Şengaliyên li derveyî Şengalê kir ku li cih û warê xwe vegerin û Şengalê careke din ava bikin.
Piştî xwarina ji aliyê fermandariyê ve hate dayin hevdîtin bi dawî bû.
