Parlamenterê HDPyî yê Dêrsimî Alican Onlu derheqê serebirnayîşanê merdiman de persnameyêk da meclîsî û waşt ke Hetgirê Serekkomatê Tirkîya Fuat Oktayî cewab bido. Onlu seba ke Oktayî cewab bido persê “Serranê 37-38an de leşkerê bi pere yê bi nameyê ‘Seydvanê sereyan’ erşawitî Dêrsimî ya nê? Seba sereyê merdiman bêrî qerifnayene pere û zerdî dayî leşkeran ya nê? Seba înan butçeya dewlete ra çime ameyo cîyakerdene ya nê?” kerd
Parlamenterê Partîya Demokratîke ya Şaran (HDP) yê Dersîmî Alîcan Onlu derheqê belgeyê ke Tarîxnas Zeynep Turkyilmazî derheqê qetlîyamê Dêrsimî de bi dest kerd de persnameyêk da meclîsî û waşt ke Hetgirê Serekkomatê Tirkîya Fuat Oktayî cewab bido. Onlu ard ziwan ke Tarîxnas Zeynep Turkyilmazî rojnuşteyê leşkerêkî ke prosesê 28î de nuştbî bi dest vist û rojnuşte de qala qetlîyamî yeno kerdene. Onlu ard ziwan ke rojnuşteyê 9ê êlule de wina yeno vatene: “9ê êlule: Ma ko û daristanan gêrayî û ameyî deşte. Bolukê ma sereyê Şeytan Alî yo ke sereyê Uşakanê Şamî yo û xeylê kesanê bînan qerifna û ard.” Kitabxaneyê Ataturkî yê înternetî de zî no qewimîyayîş esto.
Onlu ard ziwan ke rojnuşteyê leşkerê bi namey Yusuf Kenan Akimî yê Samsunijî ke mabenê 27ê temmuze û 25ê êlule de rojnuşteyê xo nuşto de wina yeno vatene: “
“3ê êlule: Ma Qezaya Cevîzlî de yî. Ma saet 7an de kişta awek de bi ca bîyî. Labelê seba ke çem bi cenazeyanê merdiman dekerdebî ma têşanîye vera merdî.
11ê êlule: Ma ewro koyan gêrenî. Cenazeyanê merdiman vera merdim nêeşkeno dekewo çeman.
12ê êlule: Ma no serê sibayî rewe weriştî. Ma reyna koyan gêrenî. Ma her roje sereyan birnenî…
10ê êlule: Ma ewro ko û mekteban gêrayî. Bolukê ma sereyê serewedarnayoxêk ard. Bolukêk bîn zî sereyê Seyithanî ard. Bolukê ma de leşkerêk bi nameyê Ruşen esto. Heme sereyan o birneno.
15ê êlule: Dewa Yan yazi. Ma ewro dewa Sogutluyî de cigêrayîş kerd. Ma merdimanê şikinan arê da. Ma serekê Uşakanê Koçî ra Îbrahim Axayî çem de da guleyan ver û kişt…
Onluyî derheqê babete de nê persî persa Hetkarê Serekkomarî kerdî:
” *Çarçewa nê dokumentan de şima do cigêrayîş bikê û rastîye de rî bi rî bibê ke 38î de Dêrsimî de çi qewimîya?
* Şima sere de arşîvanê dewlete arşîvanê bînan ê Terteleyê Dêrsimî do rayaumûmîye reyde pare bikê? Seba ke vîarameyîş û eşkerayîyanê nuştekîyan ê şahîdanê terteleyî bêrê aredayene şima do xebatêk bikê?
* 37-38î de leşkerê bipereyî yê bi nameyê ”seydwanê kelleyî” amebî erşawitene Dêrsimî? Seba serebirnayîş pere yan zî dîyarî amebî dayene leşkeran? Seba naye butçeyê dewlete ra çimeyêk ame dayene?
* 37-38î de ferman amebi dayene ke cergê sivîlî sereyê dêrsimijan bibirnê? Nê sucî bi fermanan ameyî kerdene? Derheqê nê sucadaran de tehqîqatêk yan zî humkerdişêk amebi kerdene?
* Zaf çimeyan de derbaz keno ke sereyê rayberanê Dêrsim û Qoçgirî Elîşer û Zerîfa amebî birnayene û sereyê înan seba walîyê ê dewrî Abdullah Alpdoganî amebî teslîmkerdene. Bi metodê ”serebirnayîşî” amebî waştene ke şarê Dêrsimî bêro cezakerdene? Walî Abdullah Alpdoganî seba sereyanê Elîşerî û Zerîfa xelatêke daye? Eke daye kamyew butçe ra daye?
* Caardişê serebirnayîşî yo ke rojaneyê leşkerî de derbaz beno 37-38î de Dêrsimî de, 90an de şaristananê kurdan de ame kerdene û nê rojan de zî hetê OSO yo ke mutefîqê Tirkîya yo ra Sûrîye de yenê kerdene. No caardiş adetêkê dewleta tirke yo?
* Terteleyê Dersimî de bi temamî çend dewî amebî vêşnayene û çend kesî amebî qetlkerdene?
* Verê cû dokumentan de ke hetê rojnameyê Dêrsimî ra amebî parekerdene vejîya meydan ke seba Terteleyê Dêrsimî Tirkîya Almanyaya Nazîyan ra gazê jehrinî hêrînayî. No rast o ke nê gazî dinya de reya verêne vera Dêrsimijan amebî xebitnayene?
* Wezîfedarêkê dewlete yan zî leşkerêk esto ke derheqê sucanê xo yê vera dêrsimijan de amebi hukmkerdene?
* Şima seba hukmkerdişê kesanê ke Terteleyê Dêrsimî de cinîyî, domanî, kalûpirî qetil kerdî, gazê jehrinî xebitnnayî, bombayî varnayî do se bikê? DERSIM
