Parlementerê HDPyî Alîcan Onluyî waşt ke tepiştiş û tedayê vera hunermendan wa cade bêrê vindarnayene û hunermendê tepişteyî bêrê veradayene. Onluyî deyîra Yilmaz Çelîkî ra qismêk pare kerd: Çuyê to endî ma de kar nêkeno bêbext klamanê xo de ma manê to şikit
Parlementerê Partîya Demokratîke ya Şaran (HDP) Alîcan Onluyî derheqê teda û tepiştişanê vera hunermendan de eşkerayîyêke kerd. Yew eşkerayîye zî hetê Însîyatîfê Hunerî yê Dêrsimî ra ameye. Eşkerayîyan de ame waştene ke hunermendo Dêrsimîj Yilmaz Çelîk wa cade bêro veradayene.
Onluyî eşkerayîye de pare kerd ke zîhnîyeto asîmîleker, înkarker hêrişanê xo yê vera bawerî, kultur û xozayê Dêrsimî dewam keno û bale ant ser ke tedaya vera hunermendanê Dêrsimî yê ke kultur û bawerîya Dêrsimî pêşkêşê ciwananê Dêrsimî kenê tesaduf nîyê. Onluyî da zanayene ke hunermendî Onur Yanardag, Ferhat Tunç, Mîkaîl Aslan, Çayan Demîrel, Kazim Oz, Şenol Akdag û Yilmaz Çelîk hedefê operasyonanê sîyasîyan de yê. Onluyî vat hunermendê Dêrsimî bi hunerê xo wayîrê bawerî, kultur û ziwanê Dêrsimî vejîyenê. Yilmaz Çelîko ke bi îdîayan, zuran, suckerdişanê bêbingeyînan ame tepiştene û hunermandê ma yê bînî yê tepişteyî ganî cade bêrê veradayene û no konseptê şerî yo gemarin wa cade bêro vindarnayene. Onluyî vat rixmê kayanê leyminan û polîtîkayanê şerî yê îqtîdarî ma do çirey milê xo çewt nêkerê û qismekê yew deyîra Yilmaz Çelîkî pare kerd: ‘‘Çuyê to endî ma de kar nêkeno bêbext klamanê xo de ma manê to şitik.‘‘
Êyê ke deyîran virazenê, êyê ke qanûnan virazenê ra hîna bihêz ê
Hetê bînî ra Însîyatîfê Hunerî yê Dêrsimî bi heman waştişî eşkerayîyêk daye. Eşkerayîye de vera zextê serê hunermendan nêrazîbîyayîş ame ramojnayene û ame waştene ke wa Yilmaz Çelîk cade serbest bêro vardayene. Eşkerayîye de ame vatene: “Wa kes xo vîr ra mekerê ke êyê ke deyîranê şaran virazenê, êyê ke qanûnan virazenê ra hîna bihêz ê. Hunermend û roşnvîrê şarî heqanê şarî pawenê û no heqo meşru yo.” DÊRSIM – ANQARA
