Serekê Partîya Zaferî ya ke pê provakasyon û hêrişanê vera kurd û multecîyan şinasîyena, Umît Ozdagî hesabê xo yê medyaya dîjîtale de hêrişê Seyîd Rizayî kerd û vat ke ê do sey partî peykerê Seyîd Rizayî Dêrsim de birijnê û herinda ci de peykerê Dîyap Axayî ronê.
Wekîlê HDPyî yê Dêrsimî Alîcan Onluyî nê qiseyanê Ozdagî ser o eşkerayîyêke daye. Alîcan Onluyî îfade kerd ke tewirê Seyîd Rizayo ke vera dek û dolabanê dişmenî de milê xo çewt nêkerdo hema zî faşîstan rê beno derd.
Onluyî vat: “Seyîd Riza sembolanê şarê Dêrsimî ra yew o. Şarê Dêrsimî wayîrê Seyîd Riza û têkoşînê ci vejîyeno. Umît Ozdag ney pêro faşîstî bêrê pêser nêeşkenê Seyîd Rizayî zerrîya Dêrsimî ra tira bikerê. Peykerê Seyîd Rizayî seba têrîameyîşê Terteleyê Dêrsimî yew vengdayîş o. Eke Umît Ozdag eftano medyaya dîjîtale de nê wa bêro Meydanê Seyîd Rizayî de nê qiseyan vajo. Şarê Dêrsimî xayînan zî faşîstan zî hol şinasneno.
Ma soz danê şarê xo ke ma do na hişmendîya faşîste birijnê. Ma do vera pêro hêrişan wayîrê xoverdayîş û mîrasê Seyîd Rizayî vejîyê û tim faşîstan rê bibê derd.”
