Hukmatê AKP/MHPyî hinê hêvî nêdano şaranê Tirkîya. Hetan eyro bazirganîya Dînê Îslamî û nîjadperestey (nîjadperestîye) kerda. Wexto ke na bes nêveynê; dest bi operasyonanê leşkerî û ê sîyasîyan kenê. Semedo ke îqtîdar de bimanê; xo rê heme çîyan rewa veynenê. Kokê na polîtîkaya cengî şaş o. Wexto ke polîkaya cengî de, polîtîkaya înkar û îmhayî de israr bikê; tena gonîya ciwanan villa bena, tena krîzê ekonomîye vejîno, tena xizaney û veyşaney bena. Heme meseleyê Tirkîya; binge de na polîtîka ra yenê meydan. Welhasil polîtîkaya cengî de, polîtîkaya înkar û îmhayî de israr, yew gureye aqilî nîyo. Her her o, wexto ke yew cayo ke tede maneno, rayna ay cayî ro nêşono. Nê çewres serrî yo ke, na polîtakaya îmhay û înkarî dewam kena, nê çewres serrî yo ke gonî villa bena. Nê çewres serran mîyan de çewres hezar merdiman cuyê xo vînî kerdo. La hima zî na mesele rê yew çare nêdîyo. Xora esla cengkerdiş de, merdim kiştiş de meseleyî çareser nêbenê. Tirkîya de; krîzê ekonomîye zî, krîzî sîyasî zî polîtîkaya îmha û înkarî ra yenê meydan. Meseleyî; ancak bi qalkerdiş û bi diyalog hal benê. La çi heyf ke nê îqtîdar; qalkerdiş, dîyalog û kultirê demokrasî ra nasîbê xo nêgirewto.
Yewna het ra operasyonê sîyasîyî dewam kenê. Nê rojan de 718 îdarekar û aktîvîstê HDPyî tede 718 tenî ameyê tewiştiş/tepiştiş. Yewna het ra goya semedo ke dosyaya hedîseyê Kobanê de, nameyê înan zî vêreno, derheqê Hemsereka HDP Perwîn Bûldan, wekîlê HDPyî Fatma Kurtalan, Sezaî Temellî, Garo Paylan, Huda Kaya, Meral Daniş Beştaş, Hakki Saruhan Uluç, Serpîl Kemelbay û Pero Dundarî de fezlekeyî hedre bîyê. Xora verî zî Hemserekê HDPyî Selahattîn Demîrtaş û Fîgen Yuksekdage tede derheqê 108 tenan rê persîyarî abîybî. Hemserekê HDPyî yê verî Selahattîn Demîrtaş û Fîgen Yuksekdage tede, 27 tenî ameybê tepiştiş. Mehkemeya Heqanê Mêrdiman a Ewropa, Semedo ke Hemserekê HDPyî yê verî, Selahattîn Demîrtaş derhal hepisxane ra vejîyo, yew qerar dayo. Goreyê nê qerarî ganî Birêz Selahattîn Demîrtaş texlîye bibîynî, la Dewleta Tirkîya, nê qerarî, nêana ca. Tifaqê Cumhurî, semedo ke, yew het ra rayan vînî keno, yewna het ra zî Operasyonê Garê de sernêkewto, HDPyî ra û wekîlanê HDPyî ra adeta yew întîqam gêno. Wazenê ke; HDP padê û sîyaset ra tasvîye bikê. No hesab esla nêtewşêno. Hetan no şar, tasvîye nêbo, partîya şarî nêpadîna. No şar zî esla tasvîye nêbeno.
10.02.2021 de Operasyonê Garê dest pêkerd û çar rojî dewam kerd. No operasyon de, 41 yew teyareyanê cengî 48 cayî bombarduman kerdê. Garê de 2 heban zabitan, yew çawişî û 13 merdimî ke 5-6 serrî ra ver ameybê tepiştiş cuyê xo vînî kerdê. Berpirsîyarê merdişê nê merdiman, sîyasî îqtîdar o. Eke no operasyon nêbênî, nê merdiman cuyê xo vînî/vîndî nêkerdênî. May û pîyê nê merdiman, semedo ke nê merdimî, verra bidîyê; yew het ra muraceatê hukmatê AKPyî kerdê, yewna het ra muraceatê sazîyanê heqanê yê merdiman kerdê. La hukmat, no mureceat nêgirewto çiman ver.
Cengkerdiş de, eke yew meşrûyet çin bo, cengkerdiş bi xo yew cînayet o. Ceng de, ayo ke kişeno xizan o, ayo ke zeh beno xizan o. Yew het ra faturaya cengî, yewn het ra faturaya Korona Vîrusî xizananê Tirkîya rê birêna. Tirkîya de, bi des mîlyonan bêkar û bêgure estê. Her roj na hûmare, vêşî bena. Her roj vayey vêşî bena. Şarê Tirkîya; adeta veyşaney ra nişno nefes bigêro. Her roj dikan û kargehî padînê. Semedo ke nîşnê îdareyê xo bikê/bikerê, her roj merdimi întîxar kenê. Rojevê şaranê Tirkîya cîya yo, ê îqtîdarî cîya yo. Ceng de; menfeetê şaran çin o. Menfeetê şaranê Tirkîya aşîtî de yo, demokrasî de yo.
