Hemkarê Serekê Baroyê Amedî Mehdî Ozdemîrî ke ANFyî rê qisey kerd, tecrîdê Îmraliyî sey vera huqûqî hesibna û vat ganî tecrîd cade bêro wedaritene.
Mehdî Ozdemîr vist vîrî ke Îmrali de hîrê serrî yo tecrîdo qetî yeno rayraberdene û vat: ”Seke yeno zanayene Birêz Abdullah Ocalan û tepişteyê bînî nêeşkenê merdiman û avûkatanê xo reyde pêvînayîş bikerê. Tekîlîya înan bi teberî çîn a. Verî zî çîyê winayênî qewimîyayî û ewro caardişê teberê huqûqî yenê kerdene.”
Ozdemîrî bale ante grevanê vêşanîye yê ke zîndanan de yenê domnayene ser û wina dewam kerd: ”Zîndanan de vera sîstemê Îmraliyî û semedê çareserîya demokratîke grevê vêşanîye dîya destpêkerdene. Yeno waştene ke nê caardişê teberê huqûqî heme Tirkîya de bêrê caardene. Tecrîd tesîrê heme komelî keno. Ma sey 330 avûkatan semedê pêvînayîşê Îmraliyî muracat kerdbi la cewab nêdîya ma. Ma bi waştişê wedaritişê tecrîdî reyna muracat kerd.
Îmrali de îşkenceyo sîstematîk est o. Qanûnê zereyî û pêkerdişî mîyanneteweyî yenê binpaykerdene. Zîndanê Îmraliyî bi koordinasyonê pabesteyê serekkomarîye yeno îdarekerdene. Nê hetî ra eşkera yeno vînayene ke tecrîd hetê hukmatî ra yeno kerdene. Nê qerarê cezayê dîsîplînî eslê xo de hetê Dadgerîya Înfazî ra nêameyî girewtene. Nê qerarî semedê caardişê tecrîdî sey belgekerdişê huqûqî yenê girewtene. Destûr nêdanê avûkatî vera nê îtîraz zî bikerê. Bi qeraranê keyfî û teberê huqûqî tecrîd yeno xorîkerdene. Ganî semedê wedaritişê tecrîdî têkoşîno huqûqî bêro xurtkerdene.”
