Wekîlê HDPyî û Hemserekê Komîsyonê Têkilîyanê Teberî yê HDPyî Hişyar Ozsoyî derheqê hêrişanê îşxalî yê dewleta tirke yê vera Rojawanê Kurdîstanî de ANFyî rê qisey kerd.
Ozsoyî pare kerd ke derheqê hêrişê Taksîmî de agahîyê raştikênî nêzanîyenê û a raşte no hêriş seba zemînê hêrişkerdişê vera Rojawanî ameyo organîzekerdene. Ozsoyî da zanayene ke îqtîdarî kurdan kamca de destkewteyêk visto destî hêrişê uca keno û weçînayîşan ra verî pê zêdînayîşê nîjadperestîye zî wazeno ser bikewo.
Ozsoyî ard ziwan ke muxalefetî zî seba hêrişê vera kurdan hukmat de hemkarîye kerda û vat: “Muxalefeto sereke nêeşkeno verê polîtîkayanê neteweperwer û şerwazan ê hukmatî vejîyo. Erdogan key şerêkî bido destpêkerdene muxalefet zî peyê ci de şino.”
Ozsoyî bale ante ser ke Erdogan bêdestûrê Amerîka û Rûsya nêeşkayêne nê hêrişan bikero. Hişyar Ozsoyî pare kerd ke HDP sey vizêrî ewro zî hetê xoverdayîş, têkoşîn û destkewteyanê Kobanê de yo.
Ozsoyî pêhesna ke îqtîdar wazeno pê hêrişanê vera Rojawanî ameyoxê welatî dîzayn bikero û ganî her kes vera nê hêrişan tewirê xo bimojno. Ozsoyî vat: vat: “Eke muxalefeto sereke mîyanê sînoranê kayanê Erdoganî de têbigêro, do dima zaf poşman bibo. Meseleya kurdan meseleya verêne ya Tirkîya ya. Muxalefetî heta nika seba çareserîya na mesele gamêka zelale nêeşte. Muxalafet têna sey vagonê AKP-MHPyî têgêreno. Muxalefet kayanê Erdoganî vîneno la seba ke ê bi xo nîjadperest ê yan zî pêlê nîjadperestîye ra tersenê bêveng manenê.” STENBOL
