Berpirsîyarê Têkilîyanê Teberî yê HDPyî Hîşyar Ozsoyî îfade kerd ke projeyê Tirkîya yê derheqê Esadî û Sûrîye dewam kenê û vat waranê mîyanneteweyî de gore serranê verînan seba kurdan paştdayîşêko pîl esto û tesîrê nê paştdayîşî do bibê
Berpirsîyarê Têkilîyanê Teberî û Hetkarê Hemserêkanê Pêroyî yê Partîya Demokratîke ya Şaran (HDP) Hîşyar Ozsoyî Bînaya HDPyî ya Kayapinarî de rojnamegeran reyde ame têhet û polîtîkayê ercnayî.
Ozsoyî vat: “Seba ke Tirkîya de mesela ekonomîkî û krîzî estbî Tirkîya seba ke xo bixelisna hêrişê Sûrîye kerd. Rayaumûmîye wina hesibnena ke Esad ser kewt la Erdogan bin kewt. Tirkîya şerê Sûrîye ra tepîya kamî mendî ardî pêser û vera kurdan şer kena. Erdogan bi mesela multecîyan seke Ewropa esîr girewt. Neteweyê Yewbîyayeyî mecbur ê ke na mesela çare bikê. Seba çareserîyan ma NYyî de, Rûsya, DYA û Misirî de pêvînayîşî kerdî û pêşnîyazê xo vatî. Tirkîya wazena ke seba xo bizorî Sûrîye de yew ‘herêma biasayîşe’ awan bika. Eke Erdogan firsend bivîno sere de Kobanê eşkena hêrişê Rûsya zî bika. Eslê xo de Tirkîya projeyanê xo yê Esadî û Sûrîye domena. Pêro hêzan ano ca û bi înan hêrişê kurdan keno. Yanî Tirkîya sey waştişê Esadî têgêreno.
Kurdî mecbur ê ke Esadî reyde pêbikê. Sûrîye cayêk o ke bingeyê çarekerdişê meselan o.Sûrîye seba pêroyê meseleyanê ma de rolê eşkerakerdoxî de yo. Hem hêzanê herêmîyan û hem zî hêzanê mîyannetweyan ra pawenê ke yew komelê newe yê Sûrîye saz bikê. Çarçewa şerê Sûrîye de qeyûmî tayînê şaredarîyanê ma ameyî kerdene. Hêrişê vera destkewteyanê kurdan dewam kenê. Seke şima vînenê îqtîdar ho beno parçe parçe. Prosesê tarîxî de îqtîdarê ke nêeşkê mesela kurdan çare bikê pêro çin bîyî. Rojhelatê Kurdîstanî de wahşetêk esto. Krîzê ekonomîkî û rejîmo biteda hêrsê şarî kenê zêdêr. Kifş o ke na rewşa hîna derg biba.” Ozsoyî pare kerd ke wareyê mîyanneteweyî de naye ra ver seba kurdan û têkoşînê kurdan sempatî û paştdayîşêko winasênî nêamebî dîyene û vat bêşik o ke tesîrê nê paştdayîşî û sempatî zî do bêrê dîyene. AMED
