Serekkomarê Tirkîya Erdogan semedê qiseykerdişê Komelê Pêroyî yê Neteweyanê Yewbîyayeyan (CGNY) şi Amerîka la hetê heyetêkê fermî ra nêame pêşwazîkerdene, nêeşka Joe Biden reyde pêvînayîş bikero. Serdogan semedo ke Putin bivîno şi Soçî. Pêvînayîşê Erdogan û Putinî ra dima eşkerayîye nêdîyaye.
Hemvervatoxê Têkilîyanê Teberî yê Partîya Demokratîke ya Şaran (HDP) Hişyar Ozsoyî zîyaretê Amerîka û pêvînayîşê Soçî ANFyî rê ercnayî. Ozsoyî pare kerd ke ajandaya mabênê Tirkîya û Amerîka de taşeronîya Meydanê Teyarayan ê Kabîlî, ajandaya mabênê Tirkîya û Rûsya de zî S-400î, Qirimi, Dengizê Reş û Sûrîye de mendiş estê.
Ozsoyî qiseykerdişê xo de wina vat: ”Rûsya wextêkî ra nata Efrîn û Îdlîb de vera noqtayanê Tirkîya hêriş kena. Erdogan coka wazeno Putinî reyde ronişo. Erdogan wazeno krîz bineyl bivisno erey. La peynîya peynî de ê do bikewê pê. Erdoganî wextêkê dergî nakokîyanê mabênê Amerîka û Rûsya ra îstîfade kerd. La hînî wextê na polîtîka qedîya. Bidenî semedê koordînatorîya Rojhelatê Mîyanênî û Afrîkaya Vakure Brett McGurk wezîfedar kerd.Beno ke mabênê Amerîka û Rûsya de pêkerdişêk bêro kerdene. McGurk semedê ney xîret keno.”
Ozsoyî îfade kerd ke têkilîyê mabênê Tirkîya û Amerîka hol nîya û vay: ”Coka Erdogan nêeşka Biden bivîno. Labelê Roma de kombîyayîşê G20î de beno ke pêvînayîşêk bêro kerdene. No binkewtiş o. Tewr peyên Obamayî 10 serrî verî Tirkîya zîyaret kerdbî. Nê 10 serran de Tirkîya ha rijîyena. Erdoganî pê vateyê ‘Ma do S-400an cayêkê cîyayî de ca bikerê’ semedo ke Amerîka paştî nêda kurdanê Sûrîye mesele ana bazarê serê Rojawanî. Nika budçeyê Wezîrîya Pawitişî yê Amerîka ra 170 mîlyon dolar dîyeno HSD. Amerîka verî zî Rojawanî rê zîyaretê dîplomatîkî yê xurtî kerdî.
Destpêkerdişê dîyaloganê Amerîka-Îranî, destûrê semedê binpaykerdişê ambargoyê vera Sûrîye mojnenê ke babeta Sûrîye de Rûsya reyde pêkerdiş ameyo kerdene. Nê pêro yenê manaya vurîyayîşê neweyî. Ma do bivînê ke Sûrîye de do çita bibo. Pêvînayîşê Komelê Pêroyî yê Neteweyanê Yewbîyayeyan yan zî ê Soçî mojnenê ke meqesê mabênê Amerîka û Rûsya semedê Tirkîya beno teng. La Tirkîya nêeşkena ne Amerîka ne zî Rûsya tam bikera dişmenê xo. Eke wina bikera wirdî zî destî ra şonê.” STENBOL
