Koordînasyonê Partîya Azadîya Cinîyan a Kurdîstanî (PAJK) Endama Meclîsê PAJKî û Endama Konseya Rayberdişî ya KJKyî Delal Nurhak (Esma Arat) û Zîlan Qamişlo (Gulîstane Osman) ke aye reyde şehîd bîya, serrgêra hîrêyîne ya şehadetê ci de yad kerdî
Eşkerayîya Koordînasyonê Partîya Azadîya Cinîyanê Kurdistanî (PAJK) de nê çîyî ameyî vatene:
“Ma endama meclîsê xo yê PAJKî, Heyetê Îdareyî ya KJKyî embaze Delal Nurhak û embaza xo ya ciwane Zîlan Qamişlo serrgêra 3. ya şehadetê înan de bi minet û rêzdarî yad kenê.
Serra 1984î de Hemleya 15ê Tebaxe reyde Ewropa de têkoşînê şarê kurdî aver şi. Embaze Delal Nurhak 1989 de tewra partîye bîye. Aye heta şehadetê xo rayraşîyayîşê azadîye rê dewam kerd. Embaze Delale 13ê êlula 2019î de Herêmanê Pawitişî yê Medya de, milîtana ciwane Zîlan Qamişlo reyde netîceya hêrişê hewayî de şehîd bîyî.
Embaze Delal Nurhake bi keda 33 serran bîye serkêşanê partî û têkoşînê şara ma ra yewe. A tim perwera Rayber Apoyî, bîye milîtanêka serkêşe û mîsale. Aye tim erkê xo ardî ca. Aye Ewropa de awankerdişê rêxistinîya Yewîya Cinîyan ê Welatperweran a Kurdistanî (YJWK) de ca girewt. Aye her parçeyê Kurdistanî de zî rêxistinkerdişê komelî de cagirewt û kelecanê xo vilayê her cayî kerd. A zîndananê dewleta tirke û Îranî de tepişîyaye la uca de zî kulturê zîndanî yê Apogîran mojna. Wexto ke aye verê xo da koyan embazanê xo reyde bi fedakarî, kede û xoverdayîşêkê bêhempayî ameyox aferna. A hetê şarê ma ra sey serkêşêka şorişgêre şinasîyaye û bi na bawerîye têkoşîn kerd.
Embaze Delal Nurhak qirkerdişê elewîyan, polîtîkaya koçkerdişî, koletîya cinîyan û raştîya qirkerdişî kesayetê xo de serûbin kerdî. A bi nasnameyê xo yê elewîye û kurdayetîye bi ruhê neteweyî her cayê Kurdîstanî de xebitîyaye. A bi tewirê xo bîye serkêş û şorişgêra şarî. Aye Şorişê Rojawanî de bi eşqêkê pîlî xebatî kerdî, komel awan kerd û şorişê cinîyan ê Rojawanî rê erjê pîlî verdayî. A seba ke mesuldarîyanê xo bîyara ca tim mîyanê PAJKî de bi hesasîyetî têgêraye. Aye tim krîterê partîbîyayîşî yê PAJKî xo rê kerdî esas.
Her çiqas ma pê şehadetê embaz û hemraya xo ya bêhempa, milîtana serkêşe Delal Nurhake xemgîn bibê zî ma do tim wayîrê mîrasê têkoşînê aye vejîyê. Ma do aye sey milîtana serkêşe ya têkoşînê xo, ruhê şerê ma û vîrê îradeyê xo bidê ciwîyayene.
Embaza ma Zîlan Qamişlo 2015 de beşdara refanê azadîye bîye. Aye wextê hêrişanê DAIŞî de mîyanê YPJyî de şer kerd. Aye domanîya xo de Rayberîye û partîya ma şinasnaye. Serra 2018î de aye verê xo da koyan û eşqê xo vurna gerîlatîye. Ma reyna embaze Zîlane Qamişlo yad kenê. Ma do qetî huyayîşê aye, zerrîpakî, kedkarî û jîhatîya aye xo vîr a nêkerê. Aye rixmê ciwanîya xo zî mesuldarîya dewaya Kurdistanî girewte xo milî. Ma soz danê ke dewaya têkoşînê azadîya cinîyan pîl bikerê û pêro hêvîyanê cinîyan bidê ciwîyayene.
Serkêşîya YJA-Starî de Herêmanê Pawitişî yê Medya û Vakurê Kurdistanî de gerîlayî xoverdayîşêkê bêhempayî kenê û tarîxî newe ra nusenê. Şerê gerîlayan qesasê şehîdanê ma yo. Ewro îradeyê têkoşînê Delalan û Zîlan Qamişloyan her cayê Kurdîstanî de namluyê çekanê gerîlayan de beno hêrs û teqeno. Şexsê embaze Delal Nurhak û Zîlan Qamişlo de ma reyna pêro şehîdanê şorişî bi rêzî yad kenê. Ma venga pêro ciwanan, cinîyan û şarê ma danê ke seba rijnayîşê rejîmê faşîstî yê AKP-MHPyî wurzê we. Nê esasî ser o ma pê bawer ê ke şarê ma her ca de xeta şehîdan de cewabêkê pîlî bido îşxalkeran û dişmenî.” BEHDÎNAN
