Çalakîya Nobeta Edaletî ya keyeyê Şenyaşarî ke 9ê adara 2021î de verê berê Edlîyeyê Rihaye de dabî dest pêkerdiş roja 639. de dewam kena. Pankartê ke dayîka Emîne Şenyaşar û Ferît Şenyaşarî verê berê edlîyeyî de daliqnabî dêsê edlîyeyî, nizdîyê yew hewteyîyo ke pê wesayîtanê fermîyan yenê astengkerdiş.
Ferît Şenyaşarî dîyar kerd ke Nobeta Edaletî ya înan serra 2. de ya û da zanayîş ke roje de bi seyan kesî yenê edlîye. Şenyaşarî ard ziwan ke herkes bêedaletî û bêhuqûqîya bîyaye vîneno û wina vat: “Nêweşxaneyê Pirsûsî de parlementerêk û merdime ci qetlîyam viraştî. Hukm tu çîyêk rê nêbeno û zilm dewam keno.”
Şenyaşarî da zanyîş ke serdozgerîya komerî herinda ke edalet pê bîyara seba ke pankartê ma yê ke ma dêsan de daliqnayî nêrî dîyayîş hem hetê çepî de û hem zî hetê raştî de wesayîtan bi ca kerd û wina vat: “Nê wesayîtî tena seba astengkerdişê dîyîşê pankartan tîya de vindarnayîş. Amacê astengkerdişê pankartan pê wesayîşan nimitişê heqîqetî yo. Ma heqdar î û têkoşînê ma rojeva Meclîsî de yo. Heta ke neheqî û bêedaletî peynî nêbo ma verê berê edlîyeyî ra nêşinê. Ma serdozgerîye rê zî vanê ke heqîqet nêeşkeno bêro nimitiş. Wesayîtê şima yê ke tîya de vindenê nêeşkenê têkoşînê ma asteng bikerî.” RIHA
