Piştî 48 saetan parêzerên bi rojnameger Sadiye Eser û Sadik Topaloglu re hevdîtin kir. Parêzeran da zanîn ku rewşa rojnamegeran baş e û tê payîn ku di roja duşem an jî sêşemê de sewqî dadgehê bên kirin
Nûçegihanên Ajansa Mezopotamyayê (MA) Sadiye Eser û Sadik Toplaoglu di şeva 29’ê mijdarê de dema ku ji buroya ajansê derketin, ji aliyê polîsan ve hatibûn binçavkirin. Der barê rojnameger Eser û Topaloglu de heta 24 saetan qedexeya hevdîtina parêzer hatibû dayîn.
Parêzeran îro piştî 48 saetan bi rojnameger Eser û Topaloglu re li Şaxa TEM’ê ya Midûriyeta Polîsan a Vatan a Stenbolê hevdîtin kirin. Parêzeran têkildarî hevdîtinê agahî dan û diyar kirin ku rewşa Eser û Topaloglu baş e. Parêzeran da zanîn ku di 29’ê mijdarê saet derdora 18.00’an de dema ku rojnamegeran li restoranekê xwarin dixwar, polîsan bi hinceta der barê wan de biryara binçavkirinê heye, her du rojnameger binçav kirine.
Bi domdarî jî parêzeran ev agahî dan: “Piştî kontrola tenduristiyê jî rojnameger Eser û Topaologlu birin Şaxa TEM’ê ya Stenbolê. Rewşa tenduristiyê ya Eser û Topaloglu baş e. Silavên wan ji hemû hempîşeyên wan re hebûn. Eser û Topaloglu xwestin ku karê xwe asteng nekin û nivîsandina xwe berdewam bikin. Ji ber der barê dosyayê de biryara veşartinê heye, têkildarî naveroka dosyayê me agahî negirtin. Em li bendê ne di roja duşemê ya jî sêşemê de sewqî dadgehê bên kirin.” STENBOL
