Kampanya ‘Ji Abdullah Ocalan re azadî ji pirsgirêka kurd re çareserî’ ket meha sêyemîn. Di çarçoveya kampanyayê de di 27’ê Mijdarê de grevên birçîbûnê yên dorveger hatin destpêkirin. Siyasetmedara girtî Sebahat Tuncel jî di 28’ê kanûnê de tvli greve bû û bang kir ku divê her kes berpirsyariya xwe bîne cih. Endama Kooperatîfa Parêzerên Jin a Femînîst a Barselonayê (IACTA) parêzer Altamîra Ana Guelbenzu ku di delegasyona tecrîdê ya navneteweyî de cih digirt der barê grevên birçîbûnê û tecrîda giran de axivî û bang li hikûmeta Tirk û saziyên navneteweyî kir ku bikevin tevgerê.
Parêzer Altamîra da zanîn ku siyaseta tecrîdê ya tê meşandin tu aliyê wê yê hiqûqî tune ye û mînaka girtîgeha Îmraliyê tune ye. Altamîra wiha dirêjî daye: “Rewşa heyî ya Birêz Ocalan, di alî mafê mirovan û standardên mafê mirovan a navneteweyî de nayê qebûlkirin. Tu aliyekî hiqûqî yê rejîma tecrîda topyekun tuneye. Di dîroka Ewropaya modern de jî mînaka wê tuneye. Pergala Îmraliyê di panaromaya girtîgehên Ewropayê de mînakeke ku nehatiye dîtinê. Şertên Birêz Ocalan têde tê girtin dijmirovahiye. Ev rewşa tecrîdê di alî krîterên Konseya Ewropayê de teqez nayên qebûlkirin. Li gorî rêbazên infaza girtîgehan a Ewropayê divê têkiliya girtî neyê sînorkirin. 3’emîn xala Peymana Mafê Mirovan a Ewropayê jî vê qedexe bike.”
Di berdewamiya axaftina xwe de Altamîra ev tişt anî anî ziman: “Di pêvajoyên dîrokî de girtiyan greve wek rexneyeke xurt li dijî pergalê bikar anîn. Em dizanin ku niha li girtîgehên Tirkiyeyê girtiyên kurd kampanya greva birçîbûnê dimeşînin. Salên dawî de grevên birçîbûnê wek teşeyek têkoşînê ya kolektîf hat bikaranîn. Li Ispanyayê dawiya salên 70’ê de pêkanînek wisa hat jiyîn. Li dijî rewşên dijmirovahî kampanya dan destpêkirin. Ev rexneyek xurt a li dijî pergala ceza û girtîgehan bû. Niha îro li Tirkiyeyê girtiyên siyasî jiyana xwe dane holê û rewş krîtîke. Ev nayê qebûlkirin. Divê saziyên siyasî berpirsyariyê bigirin.”
Altamîra da zanîn ku divê li dijî grevan berpirsyarî bê cih û wiha anî ziman: “Wisa nebe wê pirsgirêkên tenduristiyê derkevin holê. Rewşa girtiyên siyasî krîtîke. Divê vîtamînên pêwist bên dayîn. Mixabin rojên pêş de wê komplîkasyonên tenduristiyê derkevin holê. Girtî li dijî binpêkirinan serî li vê têkoşinê dane. Ez piştevanî, hêz û hezkirina xwe ji hemû girtiyên di grevê de ne re dişînim. Kampanya greva birçîbûnê serlêdaneke radîkal û dawî ya ji girtiyên kurd re maye. Tevgera kurd ku dîwar bezandîne, berxwedan kirin teşeyê jiyanê.Ev careke din nîşanê hemû cîhanê dane.”
