Rayberê PKKyî Abdllah Ocalano ke 15ê Sibata 1999î de bi komployêk mîyanneteweyî ame remnayîş û ardî Tirkîya 25 serrî yo Îmraliyî de binê tecrîdêk giran de yeno tepiştiş û 35 aşmî yo zî tu xeberêke ci ra nîna girewtiş. Abdullah Ocalano ke komployî sey ‘operaysonêk gladyo-NATO’ bi name keno, dîyar keno ke nê gamê ewilî yê Projeyê Girdî yê Rojhelatê Mîyanên (BOP) ke bikewo cuye yo.
Parlamentera Partîya Çepî ya Almanyaye Cansu Demîre derheqê komployê serê Abdullah Ocalanî de ajansê JINNEWSî rê ercnayîş kerd.
‘Planê dewletê ke tewrê komployî bîyî veng ameyî vetiş’
Cansuye da zanayîş ke DYA ra bigêrê heta Rûsya, Yewîya Ewropaye ra (YE) bigêrê heta Yewnanîstan, Tirkîya ra bigêrê heta Kenya, Tacîkîstanî xeylê dewletî her çend ke mabêne înan de nakokî bibî zî komplo de ca girewtî. Cansuye wina vat: “Her çend ke mabenê dewletan de nakokî bibo zî komplo de ca girewtî. Hedefê înan gird bî. Waştî ke Projeya Rojhelatê Mîyanênî yê Gird bikerê cuye. Vera nê de zî Abdullah Ocalan û têgêrayîşê azadîya kurdî sey tehluke dîyî. Waştî ke vernîya fikrê Abdullah Ocalanî bigîrê. La ewro bi Şorişê Rojawanî reyde nê planî veng vejîyayî. Nê planî de waştî Tirkîya seba Projeya Rojhelatê Mîyanênî bixebetnê. Her çend ke mabenê nê dewletan de nakokî bibê zî prosesê Efrînî de zî ameyî têkişt. Ma îşxalkerdişê Efrînî de rolê DYA, Rûsyaye dî. Almanya panzerê xo şirawit. No şerê hegemonyayî Rojawan de şîdetin bî. Bi hegemonyayê xo yê di seserrî waştî kurdan çinî bikerê û Tirkîya sey çek bi xebetnê. 40 serrî yo xîret kenê ke planan bikerî cuye. Kurdan kerdî hedef. La dîyî ke nêeşkenê xoverdayîşê kurdan û têgêrayîşê azadîya cinîyan têk berê.”
‘Sozê ke seba kurdan ame dayîş nêame ca’
Cansuye ard ziwan ke welatê ke tewrê komployî bîyî, seba rewşa Abdullah Ocalanî taqîp bikerê soz dayî kurdan la no 25 serrî yo sozê xo nêardî ca û wina dewam kerd: “Şarê kurdî bi zelalî vat ‘Abdullah Ocalan xeta ma ya sûrî yo’. Berpirsîyarî na rewşe nizdî ra taqîp kenê. La semedê wedaritişê tecrîdî tu çîyêk nêkenê. Sozê ke ameyî dayîş nêardî ca. Tecrîd hîna zêde giran kerdî. Bi mîlyonan kes wayîrê fikr û paradîgmaya Birêz Ocalanî vejîyenê. Felsefeya Birêz Ocalanî Rojawan de kewt cuye û no nûmine yo. Şar Abdullah Ocalanî sey feylesof vîneno.”
‘Welatê Ewropa tecrîdî tesdîq kerd’
Cansuye sewbîna dîyar kerd ke welatê ke tewrê komployê mîyanneteweyî her çend ke qerarê Mehkemaya Heqanê Merdiman a Ewropa (DMME) yê derheqê şertê Abdullah Ocalan de ameyî dayîş bizanê zî bêveng manenê û bi nê bêvengîye tecrîdî tesdîq kenê. Cansuye ercnayîşê xo wina dewam kerd: “Yew tesdîqkerdişê welatê Ewropa yê semedê dewleta tirkan hêrişê Îmraliyî yê hemverê şarê kurdî yo. YE, DYA, Rûsya û heme dewletê ke tewrê komployî bîyî na gonîye ra weye benê. Almanya çekan îxracê Tirkîya kena. Nê çekî zî rêxistinê terorî yê sey DAIŞî rê ke hemver kurdan de bişuxilnê anê. Fransa, Almanya tîya de teda bi sîyasetmedarê kurdî kenê. Almanya sîyasetmedarê kurd Kenan Ayaz û Tahîr Koçerî mehkemayanê xo de muhakeme kena.
‘Do bêhuqûqî dewam bikero’
Cansuye da zanayîş ke heqê hêvîye ê semedê Abdullah Ocalanî hetê Tirkîya ra çinî ameyo hesibnayîş û huqûq de cayê nê çîyî çin o. Cansuye na babete de zî wina vat: “Goreyê Pêkerdişê Heqanê Merdiman a Ewropa çinîhesibnayîşê heqê hêvîye nîno qebulkerdiş û tu huqûqê dewletan de çin o. Vera tedaya Tirkîya de dewletî bêveng manenê û do no bêhuqûqî zî dewam bikero.”
‘Bi şoreşê Rojawanî reyde fikrê Abdullah Ocalanî hîna baş ameyî fehmkerdiş’
Cansuye qiseykerdişê xo yê peyênan de vat: “Vera tecrîdê Îmraliyî, xoverdayîşêk gird yeno dayîş. No xoverdayîş heme planê welatê ke tewrê komployî bîyî veng vet. No hêvî da şaran. Hema raşteyê Kurdistanî de xoverdayîş dewam keno. Ma vînenê ke bê Birêz Ocalanî çareserî nêbeno. Tirkîya raşt nêbena. Semedê şertê Birêz Ocalanî baş bibê ma îmze Parlamentoya Ewropaye de arê da. Parlamenterêk cinî îmze nêeşt û vat nê şertî raştê. No vatiş paştîdayîşê Ewropa yê semedê komployî baş îfade keno. Bi şorişê Rojawanî reyde fikrê Abdullah Ocalanî hîna baş ameyî fehmkerdiş.” ANQARA
