Parlamenterê HDPyî Tayyîp Temel, Dersîm Dage û Murat Sarisaç ê ke grevê vêşanîye de yê peyamê Newroze pare kerd. Parlamenteran va Newroza 2019î do seba azadî û mucadeleyê Kurdan bibo hêvî
Grevê vêşanîye yê ke bi serkêşîya Leyla Guvene, seba ke tecrîdê serê Rayberê Şarê Kurdî Abdullah Ocalanî bêro wedaritene ameyî despêkerdene, dewam kenê. Leyla Guvene 128, Nasir Yagiz 115, Îmam Şîş û xoverdayoxê Strasboûrgî 89 rojî yê ke grevê vêşanîye de yê. Parlamentera HDP’yî Dersîm Dage û endamê partîye Salîh Cansever, Îsmet Yildiz, Sevîcan Yaşar, Salîh Tekîn û Bîlal Ozgezer 3’yê Adare de, parlamenterê Partîya Demokratîke ya Şaran (HDP) Tayyîp Temel û Murat Sarisaçi zî 8ê Adare de dest bi grevê vêşanîye kerdbî.
Serhat Akin û Gurbet Ektîrene wexto ke hepisxane de bîyî dest bi grevê vêşanîye kerdibi û texlîya ra dima, teber de zî çalakîya xo domnenê. Akin 59, Ektîrene zî 60 rojî yo ke grevê vêşanîye de yê. Parlamenterê HDPyî Tayyîp Temel, Dersîm Dage û Murat Sarisaçî peyamê Newroze pare kerd û va ma do bi xoverdayîşî tecrîdî bişiknê.
Ma do bi rûhê çalakwananê xoverdayoxan bivejîyê meydanan
Parlamenterê HDPyî Tayyîp Temelî peyamê xo de wina va: “Newroze seba Kurdan, her tim sey xoverdayîş ameya zanayene. La emser hem bi çalakwananê hepisxaneyan, hem bi çalakwananê teberî ma do Newroze biaçarnê, bikê roşanê demokrasî û newebîyayîşî. Newroza 2019î do bibo wesîlaya şikitişê tecrîdî. Ma do bi rûhê xoverdayîşê Heval Leyla, bi rûhê xoverdayîşê hepisxaneyan û teberî bivejîyê meydanan. Ez tîya ra venga pêroyê şarê Kurdistanî dana û vana ma do her kuçe de, bi rûhê xoverdayîşî adirê Newroze bivêşnê. Newroze do tecrîdî bişikno û berê Îmralîyî akero.Vengê Birêz Ocalanî do bireso pêroyê Kurdan. Teda û zulmê îqtîdarê faşîstî do bêro çinkerdene û xoverdayîş bi adirê Newroze bibo gur û pêt. Bi nê hêvî û bawerîye, şarê ma ganî rawirzo payan ser û veng bido xoverdayîşî.”
Ma do vera tecrîdî heta peynîye xo ver bidê
Parlamentere Dersîm Dage zî peyamê xo de wina va: “Ma venga şarê xo danê û vanê ke ma do her ca û meydanî bikê warê xoverdayîşî. Ma do xoverdayîşê xo, heta ke Rayberê Şarê Kurdî bibo azad dewam bikê. Ma do pîya û bi xoverdayîş tecrîdî bişiknê û berê Îmralîyî abikê. Tecrîd şexsê Birêz Ocalanî de ma pêroyînan rê yeno kerdene û vera tecrîdî, ma do xo ver bidê û her cayî bikê warê mucadeleyî.”
Ma do bi rûhê xoverdayîşî biresê armancê xo
Parlamenter Murat Sarisaçî zî peyamê xo de va Newroze seba pêroyê şaran yena manaya mîjdanîya wisarî û sey menga zulimî ra raxelesîyayîşî yena zanayene û wina dewam kerd: “Ma do bi Newroza 2019’î biresê armancê xo. Ewro bi hezaran girewteyî grevê vêşanîye de yê. Leyla Guvene 128 rojî yo ke grevê vêşanîye de ya. No qirayîş qîrayîşê serkewtiş û xoverdayîşî yo. No xoverdayîş do verê Kurdan û rayîrê şaranê Rojakewteya Mîyanênî akero. Şarê Kurdî her tim vera zulim û zordarîye de xo ver dayo. Ma şoreşî rê her roj hîna zêde benê nêzdî. Ma do na Newroze de zî bibê serkewte û tecrîdî bişiknê.” AMED
