Cinîya kurde Jîna Emînî ya 22 serre 16ê êlule de Tehran de hetê ‘polîsanê exlaqî’ yê rejîmê Îranî ra amebî qetilkerdene. A roje ra nata Rojhelatê Kurdistanî û Îran de çalakîyê protestoyî serkêşîya cinîyan de yenê kerdene û seranserê dinya ra cinîyî zî paştî danê nê serewedaritişî. 16ê êlule qetilkerdişê Jîna Emînî ra nata serewedaritişê şarî bêmabên dewam keno.
Parlementoyê Îranî de 227 parlementerî waştbî ke kesê ke çalakîyanê protestokerdişî yê qetilkerdişê Jîna Emînîye de ameyî tepiştene rê cezaya aliqnayîşî bêra dayîş. Waştişê nê parlementeran ra dima raydayîş ame viraştiş û 290 endaman ra 227 tenî rayê; wa çalakgeran rê cezaya aliqnayîşî bêra dayîş, dayî. La derheqê do înfaz bêrî kerdene yan zî nêrî kerdene de qerarêko tesilî hema çinîyo. Komeleyê heqê merdiman û ajansê xeberan dîyar kerdbî ke 14 hezar tenî tepişte yî. La endamê Carnegie Endowmentî Karim Sadjadpourî roja verên vat ke hûmara tepişteyan nizdîyê 15 hezar kesî ya.
Mîyanê Îranî û teberê Îranî ra xeylê kesî na rewşe sey ‘hewldayîşê qirkerdişî’ biname kerdî.
