Rixmê varayîşê torge xeylêk kesî tewrê mîtîngî bîyî. Bi seyan kesê ke warê mîtîngî de ameyî têhet bicoş dest pê govende kerd. Pankarta “Ti rayra benî, qudretê to rê şukur bo” ame akerdene. Şarê Kanîreşî bi slogananê “Deşta Kanîreşî halîngê Çep a Keske yo” û “Jin Jiyan azadî” kewtî warê mîtîngî. Warî ra vengê çapik û tîlîlîyan bi berz. Seba ke warê mîtîngî teng bi xeylêk kesî tebere warî de mendî. Salîha Aydenîz û heyet bicoş ameyî verwazîkerdene.
Badê rêzgirewtişî mektubê parlamnterê verên ê Çewlîgî Îdrîs Balukenî ame wendene ke newe zîndan ra ameyo tehlîyekerdene.
Mîtîng de verî Wekîlê HDPyî yê Çewlîgî Erdal Aydemirî qisey kerd û vat 14ê gulane de do xoverdayîşê demokrasîyî vera tarîtîye ser bikewo.
Dima ra namzed Omer Faruk Hulakî qisey kerd û vat ê do 14ê gulane de Tirkîyayêka newî înşa bikerê.
Namzede Cemîle Turhali zî vat şarê Çewlîgî do 14ê gulane de newe ra tarîx binuso.
Namzed Faruk Aris zî ard ziwan ke no vîjnayîş ya welatî keno zergûn ya zî keno wişk û vat eke Partîya Çep a Keske ser bikewo do welat sera ser bibo zergûn.
Serekê Pêroyî yê Partîya Azadî Ayetullah Aşiti zî vat ê do pêro pîya 14ê gulane de ser bikewê.
Hemsereka Pêroyî ya DBPyî Salîha Aydenîz kurdkî xîtabê şarî kerd û vat: “Şima seba ke bibê ters û xofê îqtîdarî ameyî. Ewro reyna operasyonanê qirkerdişê sîyasîyî kerdî. No tersê înan, operasyonê darbe yo. Şima eciz ê eciz, şima do şorê. Ma zanê ke no operasyonê semedê vîjnayîşî ame kerdene. La ma reyna vanê şima do ser nêkewê. Ma bi serran o xover danê, çirey peyser game nêeşte, ewro ra tepîya zî ma do peyser game meerzê. Tersê xo ra avûkatan, rojnamegeran û cinîyan destbend kernê, la se kenê wa bikerê ê do şorê. Çewlîg do 14ê gulane de rolê xo kay bikero. Şarê kurdî azadîya xo wazeno, ziwanê xo wazeno, nêwazeno bêstatu biciwîyo. Muxatabê meseleya kurdan Birêz Abdullah Ocalan o. Şima nêeşkenê pê operasyonan, qeyûman û polîtîkayanê tecrîdî ma azadîye ra bifînê dûrî. Eke Îmrali bibo azad, Tirkîya, şarî, kurdî benê azad. ”
Gama ke Aydenîze qala Ocalanî kerde yew fekî ra slogana “Bijî serok Apo” bîye berz. Badê qiseykerdişan Koma Ritmen Azad vejîyaye sehneyî ser. Mîtîng bi deyîranê kurdkî yê grûbe û govende qedîya. ÇEWLÎG
