Rayberê PKKyî Abdullah Ocalan 24 serrî yo ke Îmraliyî de binê tecrîdêk giran de yeno tepiştiş. Tecrîd û komployê hemverê Ocalanî 24 serrî yo dewam keno. 25ê Adara 2021î ra nata 27 aşmî yo ke Ocalanî ra xebere nîna girewtiş. Heme muracatê ke seba pêvînayîşê Îmraliyî yenê kerdiş zî bêcewab yenê verdayîş. Pêvînayîş bi bahaneyê cezaya dîsîplînî yeno qedexekerdiş.
Tecrîd hetê Tirkîya ra yeno rayraberdiş û raşteyê mîyanneteweyî zî seba şikitişê tecrîdî, seba çareserîya problemê kurd, rayraberdişê munaqaşayan, panel û konferansan pê ano. Tewr peynî hewteyo verên bajarê Strasbourg ê Fransaye de Parlamentoya Ewropaye (PE) bi hemkarîya Yewîya Avûkatanê Ewropa yê Seba Heqanê Merdiman û Demokrasîye (ELDH), Komeleya Demokrasî û Huqûqê Mîyanneteweyî (MAF-DAD) û Partîya Çep (Dîe Lînke), Tîfaqê Averşîyaye yê Sosyalîst û Demokratan (S&D) bi sernameyê ‘Tirkîya de heq û azadî: huqûq, zîndan û problemê Kurd’ konferans pê ard.
Konferans de ame dîyarkerdiş ke Tirkîya qerarê Mehkemaya Heqanê Merdiman a Ewropa (DMME) pê nêana, tecrîdê serê Rayberê PKKyî Abdullah Ocalanî giran kena û no tecrîd serê heme komelî de vila bîyo. Heto bîn de konferans de yewna babeta ke bî rojeve zî bêvengîya CPTyî bî. Paula Martîn Ponza ke delegasyona tecrîdî de ca gêna û tewrê konferansî bî derheqê tercrîdê girankerde, nizdîbîyayîşê dezgehê mîyanneteweyîye de ercnayîş kerd.
‘Sîstemê muhakemkerdişî seba menfîetê AKPyî yenê şuxulnayîş’
Paulaye da zanayîş ke heme sîstemê muhakemekerdişî yê Tirkîya esasê xo de seba menfîetê îqtîdarîya AKPyî yenê şuxulnayîş û heme komel texrîb beno. Paulaye wina dewam kerd: “Xoserîye ra bêparmendiş û vera tepişteyan de caardişê xirabî bîyo sey sloganê yewine yê sîstemê muhakemekerdişê tirkî. Wina asîyeno ke sîstemê edaletî xoserîya xo temamî vînî kerdo, edaletî ra dûrî kewto. Yanî sîstemê edaletî seba menfîetê îqtîdarîya AKPyî yeno şuxulnayîş. Hûmara kesê tepişteyan her ke şino zêde beno û no zî mojneno ke edalet Tirkîya de pê nîno. No zî texrîbbîyayîşê zemînê komelî mojneno. Coka ra zî zîndanê Tirkîya bi sîyasetmedar, huqûqnas, rojnamegeran pirr bîyo. No zî mojneno ke problemê kurdî çareser nêbîyo.”
‘Benê ortaxê sucî
Paulaye dewamê qiseykerdişê xo de da zanayîş ke derheqê tecrîdê serê Rayberê PKKyî Abdullah Ocalanî de vera ke qerarê Ewropa û dezgehan esto zî no pratîk de pê nîno û wina dewam kerd: “Berpirsîyarîya Konseya Ewropaye zî esta. Ganî konsey qeraranê xo pê bîyara. Ganî rayîrê demokratîke yê ke dîyar kerdî taqîp bikera. Parlamentoya Ewropa û CPT qerarê şermezarkerdişî weşanayî. Vîşêrê nê tu caardişêk pêkerdişan pê naêano. Parlamentoya Ewropa û CPT xeberêk nêdanê yan zî qerarê xo pê nêanê û heq û cuya kesê bînan kene tehluke. Konseya Ewropaye raştîye wedarita, çinî hesibnena û bena ortaxê sucê Tirkîya.”
‘Yewin çareserî azadîya Birêz Ocalanî ya’
Paula dîyar kerd ke tecrîdê Îmraliyî cezayêke ke pêro şarê kurdî rê ameya birnayîş a û sîstemê hukmî yê Tirkîya seba çinkerdişê têkoşînê şaran û têkoşînê azadî pê yeno. Paula wina dîyar kerd: “Bi eşkera yeno vînayîş ke sîstemê ceza tena seba cezakerdişê muxalefet û şarê kurdî nîyo, seba çinkerdişê têkoşînê azadîye û têkoşînê şaran zî esto. Seba nê yewin çareserîya problemî azadîya Birêz Ocalanî ya. Caardişê hemverê tepişteyan hemverê metodê demokratîke yê. Ganî lezabez Ocalan bêro veradayîş. Ganî sazgehê mîyanneteweyî têkoşînê aştîye yê şaranê Tirkîya goşdarî bikero.” ANQARA
