Tay agahîyê serê plananê neweyan ê îşxalê dewleta tirke dima ke PDKyî binê nameyê Hêzanê Pawitişê Sînorî de sewqîyatê leşkerî kerdî zelal bîyî.
Tay fotograf û dîmenê ke kewtê destê ajansê ma nînan de aseno ke pêro Hêzê Pawitişê Sînorî pabesteyê PDKyî yê. Hêzê Mesrûr Barzanîyî Zerevanî, Gulan û Parastinî bi nameyê Hêzanê Pawitişê Sînorî erşawîyayî waranê gerîlayan.
Goreyê agahîyanê ke ajansê ma vistê destî dewleta tirke ya îşxalkere seba plananê xo yê îşxalî PDKyî ra waşto ke hîna zaf tedaya waranê gerîlayan bikero. Ame parekerdene ke PDKyî seba ke rayaumûmîya Başûrê Kurdîstanî vera ney nêrazîbîyayîşê xo nêmojna Hêzê Pawitişê Sînorî sey pabesteyê artêşa Iraqî mojnayê.
Na çarçewe de PDK wazeno ke Iraq zî daxîlê polîtîkayanê xo û dewleta tirke bikero. Coka PDKyî heyetêk zî şawit Bexdadî. Dîya zanayene ke heyetê PDKyî Bexdad de selahîyetdaranê hukmatê Iraqî de ronişto û bi bahaneya ke verê bazirganîya madeyanê tîryakî û qeçaxçîtîye bigêro Iraqî ra hêzî waşte. Ame parekerdene ke PDKyî û Iraqî seba astengkerdişê bazirganîya tîryakî û qeçaxçîtîye pêkerdo ke Hêzê Pawitişê Sînorî awan bibê la PDKyî binê nê nameyî de hêzê xo şawitî waranê gerîlayan.
Ame îfadekerdene ke Hêzê Pawitişê Sînorî erşawîyayê herêmanê Dihol û Şêladizê û nê hêzê ke ê PDKyî yê, fermandarîya ci Hoşyar Zêbarî Dilêr Ferzende keno. Wina vajîyeno ke Ferzende şîyo Şêladizê zî. Ame parekerdene ke hukmatê Iraqî na rewşe ra aciz bîyo û PDKyî rê vato ke Hêzê Pawitişê Sînorî goreyê armancê awankerdişê înan bêrê şuxilnayene.
Ame dîyarkerdene ke selahîyetdaranê Iraqî naye ser o PDK de pêvînayîş kerdo û vato: ”Şima çîyêko bîn ma rê vat la waran de rewşêka cîyaye qewimîyena.”
