Ji berî çend rojan Partiya Demokrata Kurdistanê (PDK), hêzên Roj, Partiya Azadî ya Kurdistanê, Leşkerên Gulan û leşkerên taybet şand li herêmên Kendîna, Giwêr û Sergeran a Mexmûrê. Li van herêman gelek bîrên neftê hene.
Cîgirê Berpirsê Malbenda Yekitiya Nîştimaniya Kurdistanê (YNK) ya Mexmûrê Reşad Gelalî li ser mijarê axivî û wiha got: “Ew hêz ji hêzên Roj, Partiya Azadî ya Kurdistanê, Leşkerên Gulan pêk tên. Li herêmên bajaroka Dîbeka, Giwêr û Melaqere hatine bicihkirin. Hêzek mezin û pir çek in. Dest bi çêkirina çeparan kirine. Li dirêjiya çiyayê Qeredaxê çeper çêkirine. Ji Dîbeka heta Mûsilê çeper çêkirine. Dem dem baregehan ava dikin û hamir û çekên giran têde bi cih dikin.”
Gelalî aşkera kir ku her çiqas ji berî 72 saeta Amerîka û Fransayê derbarê liv û tevgera hêzên PDK’ê yên li herêma Mexmûrê hişyarî dan ku PDK’ê hêzên xwe vekişîne, lê hîn li cihê xwe ne û ji bo mayîna xwe amadekariyek berfireh dikin.
Reşad Gelalî têkildarî peywendiya wan hêzên a bi YNK’ê re jî ev tişt anî ziman: “Piştî sala 2003’yan ve ji derveyî Yekîneyên 80 ên PDK’ê tu hêzek din a pêşmergeyan li vê herêmê nîn e. Ev sînor yekalî girtiye dest. Ew hêz jî ser bi PDK’ê ne û bi biryara PDK’ê hatine. Tu peywendiya wan bi YNK’ê ve nîne.” MEXMÛR
