Navenda Nûçeyan |
Hêzên PDK’ê di 26’ê tîrmeha 2021’an de li gundê Bexme ya ser bi bajarokê Xelîfan, êrîşî komek gerîla kir. Ji wê rojê heya niha aqûbeta 3 gerîlayan nayê zanîn. Herî dawî duh jî HPG’ê bi daxuyaniyek nivîskî ragihand ku 7 gerîlayên wan li Xelîfanê ji aliyê PDK’ê ve hatine şehîdxistin. Çavdêrê siyasî Loqman Hesen li ser siyaseta şerxwaz a PDK’ê ji ajansa Rojnewsê re axivî.
Loqman Hesen diyar kir ku dewleta tirk bi xwe nikare li hemberî gerîla bigihe armanca xwe, ji bo vê jî hewl dide hêzên kurd bixe nav şer û got ku siyaseta PDK’ê ya li hemberî PKK’ê, tenê ji bo bicihanîna ferman Erdogan û Tirkiyeyê ye.
Hesen behsa girîngiya yekitiya neteweyî kir û destnîşan kir ku PDK dijî yekitiya gelê kurd e, xizmeta dagirkeran dike û ev tişt anî ziman: “Divê ciwan, zarok, kal, her kesê ku bixwaze yekitiya kurdan çêbibe, bikeve nava hewldanan. Siyaseta PDK’ê dijî xewna rewşenbîr, hunermend, siyasetmedar û gelê kurd e. Ev siyaset ji bo têkbirina destkeftiyên gelê kurd, têkdana yekitiya nav mala kurdan e. Siyaseta wan xewna dagirkerên Kurdistanê ye. Ev planek stratejîk û ya Erdogan e, wê ziyanê bigihîne hemû welatên cîhan û bi taybet jî cîran.”
