Artêşa tirk a dagirker bi hevkariya malbata sîxur a Barzanî û çeteyên wê êrîşên hewayî û bejayî li dijî deverên cuda yên başûrê Kurdistanê pêk tîne. Artêşa dagirker li Başûr gundan bombebaran dike û dişewitîne. Jiyana kurdên Başûr di xetereyê de ye.
Sekreterê Partî Demokratî Kurdistan – Sûriya (PDK-S) Ciwan Siko têkildarî êrîşên dagirkeriyê yên artêşa tirk a bi hevkariya PDK’ê pêk tê axivî. Ciwan Siko diyar kir ku dewleta tirk a dagirker ji destpêka avabûna xwe de siyasetên qirkirin û dagirkirinê dide meşandin. Li başûrê Kurdistanê jî van siyasetan dide meşandin û serweriya Iraqê jî binpê dike.
Ciwan Siko diyar kir ku piştî peymana di navbera Tirkiye, hikumeta Bexdayê û PDK’ê ev êrîş zêde bûn. Wan aliyan jî hişt ku herêm were dagirkirin û şêniyên wê jî werin koçberkirin.
Siko berxwedana gerîlayan a li hemberî êrişan silav kir û diyar kir ku şandina çeteyên DAIŞ’ê ji bo ku li başûrê Kurdistanê şerê gerîlayan bikin, nîşan dide ku planên dewleta tirk a dagirker li hemberî berxwedana gerîlayan têk çûne.
Siko diyar kir ku aliyê ku herî zêde zirar ê bigihîjê PDK ye û got: “Siyasetên PDK’ê şaş in. Dewleta tirk a dagirker PDK’ê wek partiyeke eşîrî ku planên wê pêk tîne, dibîne.”
Di dawiya axaftina xwe de Siko hevkariya di navbera dewleta tirk a dagirker û PDK’ê de şermezar kir û destnîşan kir ku devberdana ji destekdayîna dagirkeran û vegera li yekitiya kurdî, çareseriya tekane ya parastina destkeftiyên gelê kurd e.
