Qezaya Sîdekanî ya bajarê Hewlêrî yê Başûrê Kurdistanî de heyetêkê PDKyî bi keya, rîsipî, selahîyetdaranê herême û PDKyijanê herême dir pêvînayîş kerd, la se kerd zî nêeşka şarî hemverê PKKyî de bipîjikno
Şarê herêma Biradostî ya qezaya Sîdekanî ya Hewlêrî amadekarî kerde ke dimayê xutbeyê Îneyî yê 12ê temmuze hemverê hêrişanê îşxalkarîye yê dewleta tirkî de çalakî virazo. Dimayo ke no ame şinawitene selahîyetdaranê PDKyî şarî rê gefî wendî ke çalakîye nêvirazê. Dimayo ke çalakî amî astengkerdene, xeylî kesê ke parlamenterê PDKyî zî tede estbî roja şemeyî 13ê temmuze de şîyî herême û bi keya, rîsipî, şarê herême û selahîyetdaranê PDKyî yê qezaya Sîdekan a Hewlêrî dir pêvînayîşî kerdî. Mîyanê ê kesanê ke şîyê Sîdekan de Erşed Hisên Lolanî yo PDKyij zî estbi ke 1ê hezîrana 2018î de dewa Bermizê ya herêma Bradostî de leşkerê tirkî yê îşxalkarî pêşwazî kerdîbî. Lolanî dimayê nê pêşwazîkerdişî 30ê hezîrane de weçînitişê parlamentoyî de PDKyî ra amebi weçînitene.
PDKyî şarî ser o zext kerd ke hemverê PKKyî de çalakîyan virazê
Goreyê hayîdarîyanê ke beşdaranê kombîyayîşî ra ameyê girewtene, heyetê PDKyî şarî ser o zext kerdo ke hemverê dewleta tirkî de nê, la hemverê PKKyî de û hêzanê Rojakewtena Kurdistanî çalakîyan bikero. Şarê herême zî cewab dayo PDKyî û vato ke gerîlayî qe nêkewtê wareyê sivîlan û tu problemê înan gerîlayan dir çino. Ronişteyanê herême pêhesna ke gerîlayî wareyê sivîlan ra dûr ê û va: “Ê cayanê berzan de yê. La rixmê nê de zî dewleta tirkî dewan û sivîlan bombardûman kena.”
Şar razî nêyo: Şirê îşxalkaran asteng bikerê
Wextê kombîyayîşî de yew keyayî parlamenteranê PDKyijan ra va: “Ganî seba her çîyî PKK sey bahane nêro ramotene, her çî eşkera yo û verê çiman de yo. Şima bi xo zî eşkenê bêrê herême û halî nizd ra bişopnê. Heta nika zî tu hêrişanê Tirkîya de vînîbîyayîşêkê PKKyî herêmanê sivîlan de nêvîrazîyayo û tu îspatêko winayên çino. Ma wazenê ke bi rayîrê dîyalogî vernîya îşxalkarîya Tirkîya bigêrê. Heman wextî de mesuldaranê partîyanê Rojakewtene (HDK-Î û HDK) ra vajê wa nêkewê mîyanê keyeyan. Gerîlayî nêkewenê mîyanê cayanê sivîlan, xora seba xo biasayîş zî nêvînenê. Eke ê ameyî zî ma bi xo eşkenê înan dir qisey bikerê, çunke ê do goş bide ma.”
Ame pêhesnayene ke heyetê PDKyî hem mîyanê şarî de gêrayo û hem zî mîyanê bazarî de gêrayo, la çîyo ke waşto bi dest nêfînayo û nêeşkayo şarî îqna bikero, nêeşkayo şarî hemverê PKKyî de hurzno. HEWLÊR
