Leşkerên dewleta tirk ên ku cenazeyê Medya Çinar revandin û di nîva şevê de bi awayekî korsanî veşartin, niha jî nahêlin ku gelê kurd sersaxiyê ji malbata Çinar bixwaze. Leşkerên ku bi awayekî dijmirovane rê li ber kesên tên sersaxiyê digirin, nehiştin ku xizmên Çinar jî derbasî gundê Margikê bibin
Girtiya siyasî Medya Çinar li Girtîgeha Tîpa E ya Mêrdînê ji bo rakirina tecrîda girankirî ya li ser Rêberê Gelê Kurd Abdullah Ocalan, di 25’ê adarê de çalakiya fedaî pêk anî û jiyana xwe ji dest da. Hêzên ewlehiyê yên dewletê ku cenazeyê Çinar revandin, bi darê zorê û bi şev li gundê Margikê yê Qoserê veşartin.
Hêzên artêşa tirk niha jî gundê Margikê yê Qoserê dorpêç kiriye û destûr nadin kes derbasî gund bibe. Xizmên Çinar ên ji Amedê xwestin biçin gundê Margikê, di ketina gund de ji hêla leşkeran ve hatin sekinandin û destûr nedanê ku biçin gund. Malbata Çinar ku ji bo sersaxiyê xwestin biçin gund, ji ber astengiya leşkeran neçar man ku paşve vegerin.
Dayikên Aştiyê bi darê zorê derxistin
Her wiha parlamenterên Partiya Demokratîk a Gelan (HDP) Tuma Çelîk, Pero Dundar, Ebru Gunay, Feleknas Uca, Necdet Îpekyuz û Selçuk Mizrakli ji di navde bi sedan kesên ku xwestin biçin gund û sersaxiyê ji malbata Çinar bixwazin, ji hêla leşkeran ve hatibûn astengkirin. Dayikên Aştiyê yên beriya cenaze çûbûn gund, ji hêla leşkeran ve bi darê zorê ji gund hatibûn derxistin. MÊRDÎN
