Navenda PEN a Kurd bi daxuyaniyekê binçavkirina aktîvîst, rojnameger û nivîskarên Rrojhilatê Kurdistanê ya ji hêla rejîma Îranê ve şermezar kir. PEN a Kurd bang li rejîmê kir ku di zûtirin dem de binçavkiriyan berde
Di rojên dawî de rejîma Îranê dest bi binçavkirina aktîvîst, nivîskar, rojnameger û çalakvanên civaka sivîl kiriye. Bi taybet jî hêzên rejîmê li bajarê Şabda û Kirmaşanê bi ser malên gelek nivîskar, rojnameger û aktivîstan de girt û binçav kirin. Têkildarî vê pêla binçavkirinê, Navenda PEN a Kurd daxuyaniyeke nivîskî bi raya giştî re parve kir.
PEN a Kurd di daxuyaniyê de diyar kir ku bi taybet jî li herêma Kirmaşanê gelek kes hatine binçavkirin. PEN a Kurd da zanîn ku ji binçavkiriyan tenê Şehryar Rûstem, Xatu Enîsa Cehferî û Mêhir hatine berdan.
Bang li rejîma Îranê kirin
Daxuyaniya PEN a Kurd wiha bi dawî bû: “Em weke endamên Navenda PEN a Kurd, li gorî peywir û bernameya xwe, parastina rûmeta mirovan dikin. Em piştgiriya kesên di rojên dawî de li rojhilatê Kurdistanê hatin binçavkirin dikin. Em bang li berpirsên Komara Îslamî dikin ku dawî li vê rewşê bînin, binçavkirinên bê belge bi dawî bikin û kesên hatine binçavkirin jî di zûtirin dem de berdin.”
