Kongreya Star ji bo vegotina armanca pêngava ‘Ax û rûmeta xwe biparêzin dagirkerî û DAIŞ’ê tune bikin’ li Qamişloyê belavok belav kir
Di çarçoveya hemleya Kongreya Starê ya bi dirûşma `Ax û rûmeta xwe biparêzin dagirker û DAIŞ`ê tune bikin` de jinên Qamişloyê belavok li şêniyan û xwediyên dikanan belav kirin da ku pêngava xwe bidin nasandin.
Jinên meclisên navçeyên Rojhilat û Rojava, rêxistina Kongreya Star, endamên jin ên Partiya Yekitiya Demokratîk û karmendên jin ên saziyên civaka sivîl tev li çalakiyê bûn.
Jinan bi cilên xwe yên gelêrî li ber Navenda Mihemed Şêxo ya Çand û Hunerê li bajarê Qamişloyê kom bûn.
Girêdayî mijarê endama rêveber a Kongreya Star a bajarê Qamişloyê Minîce Heyder axivî û ev tişt anî ziman: “Em daketin kolan û qadên Qamişloyê da ku belavokên pênasekirina pêngava xwe li ser şêniyan belav bikin. Pêngava me ji bo şermezarkirina gefên Tirkiyeyê yên li ser bakur û rojhilatê Sûriyeyê ye. Em ji wan re dibêjin hûn bi gefên xwe nikarin vîna gelê me bişikînin.”
Hêjayî gotinê ye Kongreya Star ji bo şermezarkirina gefên dewleta tirk ên li dijî herêmên bakur û rojhilatê Sûriyê di 8`ê Tebaxê de dest bi pêngava ‘Ax û rûmeta xwe biparêzin dagirkerî û DAIŞ’ê tune bikin’ kir. QAMIŞLO
