Endamê Heyetê Îdareyî yê TMMOBî Cemalettîn Kuçukî vat ke pêroyê Koyê Mûnzûrî sey wareyê madenî ameyê îlankerdene
Dêrsim de hema vajê her roje seba madenî wareyê neweyî yenê texrîbkerdene. Nika zî yeno vatene ke pêroyê Koyê Mûnzûrî sey wareyê madenî ameyê îlankerdene.
Endamê Heyetê Îdareyî yê Yewîya Odeya Muhendis û Mîmaranê Tirkî (TMMOB) Cemalettîn Kuçukî va: “Sey wareyê madenî nizdê na herême benê. Na herême de awa tewr pake ya dinya esta.”
Kuçukî vist vîrî ke Koyê Mûnzûrî yê ke dergîya înan 60 kîlometreyî ya bi temamî sey wareyê madenî ameyê îlankerdene. Kuçukî va: “Şerê mabênê Îsraîl û Filîstînî şerê dînî nê, şerê awe yo. Na coxrafya de şer wasitayêk o. Do merdiman nê herêman ra vejê û bênasname verdê. Bênasnametî bêanorî ya. Amac o yo ke şarê herêma nêeşko debara xo bikero.”
‘Ma do erdê xo bipawê’
Kuçukî va ‘Tirkîya de derheqê enerjî de zûrî yenê kerdene’ û va: “Tirkîya de sîstemê enerjî yê mewcûdî, xeylî serê kapasîteya xo de yê. La hewna zî vanê qîm nêkeno û seba sektoran hemeyê coxrafya xerepnenê. No bi temamî destê sermayeyê xerîbî de yo. Nê sîstemê otomatîkî xoza serûbin kenê. Hewna zî sîstemanê enerjî awan kenê. Na zûr a, cimatî xapênenê.”
Kuçukî va: “Ganî ma awa xo, daristanê xo, coxrafya û wareyanê xo yê cuye rê wayîr vejîyê. Merdim, bajaran de zîndanan de ciwîyeno. Ganî ma nê zîndanan ra bixelesîyê. Seba zergûnayî ma vejîyê teberê bajarî. Helbet seba nê ma do erdê xo bipawê.” DÊRSIM
