Cayê mezelê Şêx Seîd û embazanê ci yê ke 94 serrî verê cû Raşteyê Berê Koyî yê Amedî de ameyî dardekerdene hema zî nîno zanayene. Torinê Şêx Seîdî Kasim Firatî dîyar kerd ke ê serra 2010î de seba eşkerakerdişê cayê mezelan waştişname dayî meclîs û Wezîrîya Karê Zerre, la heta nika tu cewabêk nêdîyayo înan
Serewedarnayîşê Şêx Seîdî sey serewedarnayîşê yewin yê tarîxê komarî yeno zanayene. Serewedarnayîşê Şêx Seîdî 5ê Sibata 1925î de dest pêkerd. Gulana 1925î de serewedarnayîşê Şêx Seîdî ame tepisnayene û Mehkemayê Îstiklalî ameyî awankerdene. Mehkemayan de seba seyan kesan cezaya dardekerişî ame dayene. Mehkemayê Îstiklalî 29ê Hezîrana 1925î de seba Şêx Seîdî û 46 embazanê ci qerarê dardekerdişî dayî. Roja dayîşê qerarî ra rojêk dima qerar Raşteyê Berê Koyî yê Amedî de caa ame. Şêx Seîd û 46 embazê ci ewja de ameyî dardekerdene.
Dardekerdişê Şêx Seîdî û 46 emazanê ci ra 94 serrî deraz bî. La hema zî cayê mezelê Şêx Seîd û emazanê ci yê ke 94 serrî verê cû Raşteyê Berê Koyî yê Amedî de ameyî dardekerdene nîno zanayene. Her çiqas ke bêro vatene ke mezelê înan raşteyê nizdîyê Orduevî de yo zî fermîyet de çîyêko winasî çin o. Heta nika heme hewldayîşê keye û sîyasetmedaranê kurdan yê seba vînayîşê cayê mezelê Şêx Seîdî û embazanê ci bênetîce mendî. Keye 10 serrî verê yanî serra 2010î de waştişname da meclîs û Wezîrîya Karê Zerre, la heta nika tu cewabêk nêdîyayo
Torinê Şêx Seîdî Kasim Firatî derheqê babete de qiseykerd û va: “Serewedarnayîşê 1925î yê Şêx Seîdî û emazanê ci Kurdistan de bi name û veng o. Kurdistan de badê 1806î nizdîyê 20 serewedarnayîş estî. No seserre de ruhê azadîye vejîya raşte. Hedef û waştişê kesê ke tewrê serewedarnayîşê Şêx Seîdî bîyî, Kurdistan de awakerdişê cuyêka azad û bierj bî. Xeylê rengan ra kesî serewedarnayîş de est bî. Kesê sey Doktor Fûat, Fehmî Bîlal, Yûsûf Ziya, Şerko (Elewîbî), axa, wendekar, şêx û leşkerî arê bîyî û waştî ke Kurdistan de cuyêka azad û bierj awan bikerî. Hedef de çinkerdişê kurdan est bî. Merheleya ewro de kurdî qezenc kerdî. Barzan, Mehabad û Dêrsim de zî serewedarnayîş virazîya yî. Ewro koyan ser de û zîndanan de kurdî xover danî. Êdî problemê kurd bedilîyayo problemê mîyanneteweyî. Ganî ma wayîr bivejîyî. Gonayê ke ameyî rijnayene seba çar parçeyê Kurdistanî ameyî rijnayene. Ganî ma tu rey çong nêronî. Heme serkêşê kurd û sere de zî Mesût Barzanî ganî wayîrê na babete bivejîyî ûyewîya xo awan bikerî.”
Torinê Şêx Seîdî Kasim Firatî dîyar kerd ke ê serra 2010î de seba eşkerakerdişê mezelan waştişname dayî meclîs û Wezîrîya Karê Zerre, la heta nika tu cewabêk nêdîyayo
Şêx Seîd Efendî serra 1865î de dewa Xinisî Qolhîsar de ameyo dinya. Nameyê kalikê Şêx Seîd Efendi Şêx Elî Septî yo. Kalikê Şêx Seîdî Şêx Elî Septî Efendi eslê xo dewa Bismilî Çilsitun ra yo. Şêx Elî Septî Çilsitun ra koç kerdo, dewa Paliyî Kelxasî. Kelxasî de zaf suxteyî weriznayî û dînê îslamî ser o xizmet dayo şarî. Babîyê Şêx Seîd Efendî Şêx Mehmud Feyzî seba gureyê îrşadî Pali ra koç keno şino dewa Qolhîsarê Xinisî. Şêx Seîd Efendî medresanê Pali, Xarpêt, Amed û Mûşî de perwerde dîyo û mergê babîyê xo ra pey, ey cayê babîyê xo girewto û bîyo serekê terîqeta naqşîbendî. Şêx Seîd Efendî di rey zewecîyayo. Panc lac û panc kênayî, pêro yewedes tutê Şêx Seîd Efendî ameyê dinya. Şêx Seîd Efendî hemberê dirîyîye de bêveng nêmend. Şêx û alimê kurdan rê mektubî nuştî û înan ra hetkarî waşte. Fikrê Şêx Seîd Efendî de çîyo ke kurdan û tirkan pê ra girêdayne tena dîn bi. Hukmatê tirkan dîn zî wedartibi, nika ra pey çîyo ke înan pê ra girêbido nêmendbi. AMED
