Ame zanayene ke serebûtê îstîsmarî yê Pêrtagî hetê çeteyêkî ra serra 2004î ra nata dewam keno û kargeho ke dîmenê îstîsmarê domanan amebî antene hetê polîsan, leşkeran û notiran ra tim ameyêne zîyaretkerdene
8ê çeleyî de vejîyabi meydan ke Harun Yildirim qezaya Pêrtagî ya Dêrsimî de tewr tay 15 domananê lajan rê tacîz û tecawuz kerd. Çarçewa tehqîqatî de Harun Yildirim û 3 kesê bînî ameybî destbendkerdene.
Cigêrayîşê kompîtir û telefonê Harun Yildirimî ra dima dîmenê îstîsmarî ameyî eşkerakerdene. Harun Yildirim û di kesê bînî ameyî tepiştene la gumandar Ahmet Oguz seba ke derheqê ci de delîlê qîmî çinbî ame veradayene. Oguzî dima ra xo kişt. Di kesanê destbendkerdeyan ra yew zî lajê notirêkî yo.
Serra 2018î de Harun Yildirim reyna Pêrtag de kênayêka astengdare tacîz kerdbi la Serdozgerîya Komare ya Pêrtagî derheqê Yildirimî de bira bêteqîbe dabî.
Tecawuzî 2004î ra nata dewam kenê?
Harun Yildirim o ke Pêrtag de serra 2004î ra nata dikanê ci yê telefonî û kompîtirî esto verê cû zî înternet cafeyê ci estbi. Goreyê îdîayan nê serebûtanê tecawuzî serra 2004î ra heta nika dewam kerdêne. Her çiqas hûmara domananê ke maruzê îstîsmarê Yildirimî bîyî 15 bîye zî yeno şikkerdene ke na hûmara hîna zêde ya. Yeno îfadekerdene ke sucdarê nê îstîsmaran 3 kesan ra zêdêr ê.
Şarê Pêrtagî ard ziwan ke nê îstîsmarî hetê çeteyo ke tede polîsî, leşkerî, notirî estê ra ameyî kerdene û nê kesî tim û tim şîyêne û ameyêne dikanê Yildirimî. Çarçewa tehqîqatî de îfadeyê zaf leşkeran, polîsan û çawuşan ameyî girewtêne. Ame îdîakerdene ke polîsêk zî ame destbendkerdene.
Goreyê dîmenanê îstîsmaran ame eşkerakerdene ke domanî dima ke dayîye xoraşîyene ameyî tecawuzkerdene û dîmenê nê îstîsmaran ameyî rotene. Ame îdîakerdene ke nê serebûtî têna Pêrtag de ney Xozat û Xarpêt de zî qewimîyayî û domanî bi pereyan ameyî rotene.
Reyna operasyonê fuhuşî de ke heman wextê tehqîqatê Yildirimî de dest pêkerd ame eşkerakerdene ke çawuşêk di serran ra nata Pêrtagî ra domanêk berdêne bi Xarpêt û uca de ci rê tecawuz kerdêne. Çawuş wezîfe ra ame girewtene.
6 keyeyan gerre kerd
Goreyê zanayîşê Baroyê Dêrsimî heta nika 6 keyeyan gerrayê îstîsmarî kerd û tay keyeyî zî nêefteranê ke îfade bidê û xo nimnenê. Avûkatê baroyî seba ke derheqê dosya de bira nimite esta nêzanenê ke çend kesî ameyî destbendkerdene û tepiştene. DÊRSIM
