Endamê Komîteya Rêveber a PKK’ê Duran Kalkan 13’yê tîrmehê bi rêya bernameya ‘Ulkeden’ a televîzyona Medya Haber, li dijî dagirkeriya tirk a li ser başûrê Kurdistanê bangeke girîng li Pêşmergeyên Başûrê Kurdistanê kir û wiha got: “Em weke PKK 40 sal e, li dijî êrîşkariyeke wisa şer dikin û li ber xwe didin. Gerîla li Xakûrkê jî li ber xwe da, niha li Heftanînê jî bi qehremanî li ber xwe dide. Weke tevger em li ber xwe didin û wê gerîla li ber xwe bide. Helbet li vir em dixwazin pêşmergeyan jî li kêleka xwe bibînin. Ji bo têkbirina plana qirkirina kurd a AKP-MHP’ê me berî niha jî banga têkoşîn û berxwedaneke hevpar li partî û rêxistinên din kir û niha jî bang li wan dikin.”
Pêşmergeyên Dêrîn ên başûrê Kurdistanê piştgirî dan peyama Endamê Komîteya Rêveber a PKK’ê Duran Kalkan. Yek ji Pêşmergeyên Dêrîn Derya Umer Kake Reş têkildarî mijarê axivî.
Derya Umer der barê armanca êrîşên dewleta tirk a dagirker de ev tişt anî ziman: “Armanca wan dagirkirina Kurdistanê ye. Di roja me de dewleta tirk bi rola Sedam Hisên ê dîktatorê berê rabûye. Pêwîst e li hemberî hewldanên zindîkirina serdema osmanî em weke Pêşmergeyên Dêrîn karibin ligel gerîlayan li hember vê dagirkeriyê têbikoşin. Ger Wezareta Pêşmerge û hikûmeta Herêma Kurdistanê jî di vê demê de helwesteke egîdî nîşan nede wê dîrok li ser wan binivîse.”
Umer têkildarî peyama Endamê Komîteya Rêveber a PKK’ê Duran Kalkan jî wiha got: “Peyameke pîroz û şoreşgerî ye. Niha ji bo gelê kurd bijardeya herî baş Kongreya Neteweyî ye. Çawa berê li hemberî rejîma Baas eniya kurdistanî ya di pêşengiya gelê kurd de hebû, pêwîst e niha jî hizb berjewendiyên xwe deynin aliyekî. Eniyeke hevbeş a ji her çar parçeyên Kurdistanê pêk tê, ava bikin û li dijî dagirkeriya tirk rabin.”
Her wiha Derya Umer diyar kir ku tevî her roj ji ber êrîşên dewleta tirk a dagirker welatiyên sivîl, zarok tên şehîdkirin, bax û baxçeyên welêt dişewitin jî beşek ji medya û aliyên siyasî yên kurd bêdeng in û axaftina xwe wiha bi dawî kir: “Ev şermeke mezin e. Hiş û aqilê me vê qebûl nake. Pêwîst e bi ser xwe de werin. Em kêfxweş in ku gerîla li dijî dagirkeriyê têkoşîn dikin. Em bi wan serbilind in. Ew hêzên raqteqîn ên Kurdistanê ne.” Çavkanî: Rojnews
