Tirkîye her ke şina ver krîzo ke tede ya kena xorîn. Xorînbîyayîş hetêk de krîzê neweyî zî bi kerdenanê îdarekaran qewimyenî. Meseleya esasî ya Tirkîye yanî meseleya Kurd hema zî paweyê çareserî ya. Labelê tu game seba na mesela nêameya eştene. Dorê na meseleya girde de meseleyê bînî zî xo mojnenê raya pêroyî û heme şarî benî perçeyê nê meseleyan. Seba ke na meseleya esasî bêra çareserkerdene, sere de Rayverê Şarê Kurdî Abdullah Ocalanî dima ra zî Hereketo Azadî û sîyasetê Kurdî mîyanê micadeleyêko pîl de xo ver danî. No xoverdayîş bi serran o ke bênabên dewam keno. Dewlete ge goş dana no xoverdayîş ge zî (zêdeyîr wina kena) bi tedayîyêka pîle şina serê xoverdayîşî. Labelê heta nika tu kes vera na kerdena dewlete de gamêk peyser nêeşto. Nimuneyo en pîl xoverdayîşo nikayîn o; çalakîyê grevê vêşanîye.
Xoverdayîşo ke bi Hemsereka Kongreya Komelê Demokratîk Leyla Guvene destpê kerd nika şexsê aye de 200 rojan vîyarna û teqîpgerê Leyla Guvene zî 160 rojan ra zêde yo ke çalakîya xo domnenî. Seba şiknayîşê tecrîdî û rijnayîşê faşîzmî na çalakî destpê kerd û bi îradeyêko pîl resa nê rojan. Berê Îmraliyî bi no xoverdayîş ame akerdene û Rayverê Şarê Kurdî Abdullah Ocalanî reyde pêvînayîşî ameyê kerdene. Dewlete seba ke berê Îmraliyî anêkera xo kerdibî kerre. Vengo ke Leyla Guvene û hepsîyê sîyasî bi nê xoverdayîşê xo yo pîroz resnayî dinya; berê Îmraliyî akerd. Rayverê Şarê Kurdî pêvînayîşê xo yo verên ke 8 serran ra dima avukatanê xo reyde kerdibi de behsê zaf çiyanê muhîman kerdibi la seba ke îdarekarê dewlete bi eynî cidîyetî nêzdîyê mesela nêbîyê, grevê vêşanîye dewam kerd. Goreyê çalakgeran tecrîd nêame wedartene. Pêvînayîşo diyin 20 rojan ra dima virazîya û derheqê pêvînayîşî de zanayîşê raya pêroyî kêmî bê zî îdîa beno ke do çalakîyê grevê vêşanîye biqedîyê.
Pêvînayîşo ke Îmrali de ame viraştene do rayîrêko newe abikero. La no rayîr rayîrêko seyîn o, do çi bîyaro, nika raya pêroyî nêzano. La goreyê kerdenanê dewlete wina aseno ke proseso ke merdim bieşko vajo sey prosesê çareserî, rojeva dewlete de çin o. Helbet tu kes nêeşkeno vajo bi nê kerdenan do prosesê çareserî destpê bikero. Çunkî dewlete roja ke Îmrali de pêvînayîş virazîya, eşt zindanan ser o û gelek zindanan de dest nîya radyo û kitabanê hepsîyan ser o. Na kerdene mojnena ma ke her çiqas tecrîdê Îmraliyî wedarîyo yan zî qedexeyo ke avukatan ser o bî wedarîyo, kerdenanê dewlete de tu bedelyayîş nêbîyo. Do rojanê ameyenan de se bibo kes nêzano la eke mesela kerdenê nikayînî bê kes nêeşkeno behsê ruhê çareserîye bikero. Heta ke dewlete nêra meseleya esasî ser o do xoverdayîş nêqedîyo. Aye ra çalakîyê grevê vêşanîye beno ke biqedîyê la xoverdayîş qet û qet nêvindeno û nêvindero zî. Sibarojê Tirkîye tena bi pêvînayîşêk nêbedelîno la no pêvînayîş û pêvînayîşê ke do Îmrali de dewam bikerî sibarojê çar perçeyê Kurdistanî û nînan ra girêdayî sibarojê Tirkîye û dewletê bînî yê statukoyî de gelek çiyan do bibedelno. Çim û goşê raya pêroyî Îmrali de yê û gamê ke do bêrî eştene do seba xoverdayîşî rayîrêko newe abikero.
