Peykerê Jin, Aştî û Azadiyê li Hewlêrê hat danîn û ji bo peyker ev rexne hat kirin: “Jineke pasîf sekinî, xwe dadaye ser lingekî, kirasek lê ye û di destê wê de sewîlekî avê heye, ne em in.”
Bi hevkariya ajansa Jinan a Neteweyên Yekbûyî li Iraqê (UN Women Iraq) û Desteya Bilind a Karûbarên Jinan a Hikûmeta Başûrê Kurdistanê Peykerê Jin, Aştî û Azadiyê li Hewlêrê hat danîn.
UN Women Iraq di danasîna xwe de dibêje, ew ji bo hêzdarkirina siyasî ya jinê û wekheviya cinsan xebatê dike. Ji ber wê jî, ya ku pêşî bala mirov diçe ser ew e, ka bi vî peykerî jin, aştî û azadî çawa hatiye teswîrkirin. Rênas Hesen yan jî bi navê xwe yê din Rênas Babekir, ku bi xwe jineke hem akademisyen û hem jî şair e, li ser vî peykerî dibêje, “Jinên ezîz, werin em xeyalşikestî nebin yan jî xwe nekin xeyal şikestî bi peykerekî streyotîpîk ku ti tiştî zêde nake (li doza jinan) ji bilî ku rolên cinsan ên civakî hatine avakirin, jinûve ferz bike. Jineke pasîf sekinî, xwe dadaye ser lingekî, kirasek lê ye û di destê wê de sewîlekî avê heye, ne em in.”
Piştî vê rexneyê em jî dibêjin, bila Neteyweyên Yekbûyî û Hikûmeta Başûrê Kurdistanê bifikirin ka hêzdarkirina siyasî ya jinê çi ye. HEWLÊR
