Endamê Konseya Rayberdişî ya KCKyî Cîhan Erenî serrgêra 98. ya Peymana Lozanî de derheqê mesele de ANFyî rê qisey kerd. Qiseykerdişê Erenî ra beşêk wina yo: ”Îngilîstan destpêkê seserra 20. de hêzo tewr emperyalîst bi û ey Lozan de seba xurtkerdişê destê xoi vera şaran sîyasetê parçekerdişî ard ca. Netîce de Lozan de teda, qirkerdiş û jenosîdê dewleta tirke ameyî tesdîqkerdene. A raşte na dafike bîye. Qanûno Bingeyî yê Tirkîya 1924 de Lozanî ra serrêke dima ame qebulkerdene ke înkarkerdişê kurdan ser o nusîyayo. Erdê Kurdîstanî sey erdê Tirkîya neteweya kurdan sey neteweya tirkan ameyî hesibnayene. Serra 1925î de pê Serewedaritişê Şêx Seîdî kurdan waşt cewabê Lozanî bidê la ameyî qetilkerdene.
Peymana Lozanî de kurdî pê tesdîq û paştdayîşê hêzan ê mîyanneteweyîyan ameyî înkarkerdene. Kurdî ameyî qetilkerdene la ê bêveng mendî, kurdan key seba azadîye û demokrasî têkoşîn kerd înan kurdî kerdî terorîst. Têkoşînê Azadîye yê Kurdîstanî pratîk de Lozan kerd pûç. Sîyaset û hîşmendîya înkar û çinkerdişî yê dewleta tirke hetê Xoverdayoxanê Rojeyê Mergî yê Pîlî ameyî pûçkerdene. Xulasa Têkoşînê Azadîye yê Kurdîstanî rayberîya Serek Apoyî de şarê kurdî resna kerd wayîrê statuyî.
Kurdî nêwazenê ke şertê Peymana Lozanî dewam bikerê. Erdogan zî wazeno pê Peymana Lozanî Başûr zî sey Vakur bikero serê erdê Tirkîya. têkoşînê Azadîye yê Kurdîstanî her çiqas Lozan pûç kerdo zî dewleta tirke vera peymane kurdan rê ferz kena. Amerîka, Rûsya û welatê Ewropa zî paştî danê Tirkîya.
Sere de PDK tay hêzê kurdî tehlukeyî hol fam nêkenê û nêwazenê vera ney bigêrê. Senî ke Erdogan nika PDK xapîneno o çax zî Mustafa Kemal delegasyonê kurdan xapînabi. Dima nê kurdî ameyî dardekerdene zî. Ganî ma sey kurdan statuyêkê qanûnî de israr bikerê. Têna ma pê têkoşînî eşkenê verê tehlukeyan bigêrê. Dewleta tirke înkar û çinkerdişê kurdn rê dewam kena. Têkoşînê vera na dewlete, têkoşînê seba statuyê şarê kurdî yo. Coka têkoşînê gerîlayan têkoşînê pawitişê Kurdîstanî yo.Ganî pêro kurdî bizanê ke dewleta tirke têna dişmena PKKyî nê dişmena pêro kurdan a. PKK xîret kena ke înkar û çinkerdişî pûç bikero. Înkar têna pê têkoşînê gerîlayan yeno astengkerdene. Dewletê ke paştî danê Tirkîya û PKKyî rê vanê terorît wazenê Lozan dewam bikero.
Kurdî ganî polîtîkayanê dewleta tirke ya qirkere bivînê û pê caardişê yewîya neteweyî vera dewlete têkoşîn bikerê. Kurdê ke Lozanî qebul nêkenê wa bibê yew û bimojnê ke ê vera Lozanî yê. Mîyanê şarî de yewîye bi giranî ameye caardene. Ganî terefê sîyasî zî yewîya xo bîyarê ca.”
Çime: Anf
