Ez wazena ke no nuşteyê xo de, behsê weçînayîşê Serekkomarîya Yewîya Amerîka û hêrişkerdişê Meclîsê Temsîlkaranê yê Yewîya Amerîka bika.
Heme kes zano ke weçînayîşê Serekkomarîya Yewîya Amerîka, hem seba Yewîya Amerîka, hem zî seba Cîhanî muhîm bi. Aye ra çim û goşê dinya, no weçînayîşî ser o bi. Çunku Trûmp; yew karsaz bi û Yewîya Amerîka; se yew şîrkete îdare kerdnî. Heme polîtîkaya xo de; dayîş-girewtiş û menfeetî ser o awan kerdbî. Hem zerreyê Yewîya Amerîka de, hem zî teberê Yewîya Amerîka de, politikaya ey de; yew qeyde, rayîr raybaz çin bi. Xora weçînayîş ra ver vat ke, “Weçînayîş ra pey, ez vînî bika zî şeyîşê mi bellî nîyo.” Yanî vano ke, zor bo zî, weşî bo zî , ez na Serekkomarîye nêdana.
Kurdanê Rojavayî, semedo ke DAIŞî berteraf bikê; Yewîya Amerîka tede, 60 dewletan reyde yew tifaqe awan kerdbî. No cengê DAIŞî de, bi des hezaran, ciwananê Rojavayî cuyê xo vînî kerdo. Ganî Trûmpî, goreyê mutefîqeya xo hereket bikerdnî. Ganî kurdî Rojavayî, tena nêverdaynê,
Donald Trumpî, seba Kurdanê Rojava zî polîtîkya xo de zelal nêbi. Yew het ra vatnî;” Hinê Rojava de DAIŞ qedîyayo, ma hinê hêzanê xo tepa/tepîya ncenê.” Xora semedo ke Yewîya Amerîka, hêzê xo sîndorê Tirkîya ra antê, Dewleta Tirkîya asaney reyde dekewta erdanê Rojavayî. La yewna het ra zî ekonomîyê Tirkîya dehdît kerdnî û vatnî ke; “Ez yew roj de, eknomîyê şima mehf kena.”
3 Teşrîne 2020 de, Weçînayîşê Serekkomarîya Yewîya Amerîka bi. Peynîya nê Weçînayîşî de, Joe Bidenî qezenc kerd. Trûmpî, semedo ke Weçînayîşê sabote biko, medya de beyanat, beyant ser o daynî. Rayî ke bi postayî dîyaybê, zafê înan Jeo Biden rê vejîyaybê. Trûmpî, nê rayî, se rayê sexte îlan kerdê. Semedo ke weçînayîş, newe ra bibo 80 hebî dewayî akerdê. La semedo ke delîlê ey çinbîyê, zafê mehkemeyan, mureceatê ey qebul nêkerdê. Peynîya nê weçînayîşî de; Bidenî 306 delegeyî, Trûmpî 232 delegeyî qezenc kerdê. La Trûmpî, netîceya nê weçînayîşî hezim nêkerda. Medya de, Joe Bîdenî diznayîşê rayan ra sucdar kerdnê. No xusus de, terafdarê xo enforme kerdnî.
06 Çeleyî 2021î de, semedo ke Serekkomarîya Joe Bîdenî tescil biko, Meclîsê Temsîlkaranê yê Yewîya Amerîka, yew kombîyayîş awan kerdo. Semedo ke manîyê tescîlkerdişê Serekkomarîya Joe Bidenî bibê; bi vengdayîşê Donald Trûmpî, bi hezaran merdîmê Trûmpî, der û dorê Meclîsê Temsîlkaran de kom bîyê. Der û dorê Meclîsê Temsîlkaran de, vernîya îsyankaran de, barîyerê polîsan ronîyaybê. Yew muhlet dima, polîsan nê barîyerê xo hewanayê û vernîya nê îsyankaran akerde. Nardîwanî/nêrdîwan ser o çend 4-5 hebî polîsî bîyê, înan zî rayîr akerd. Dima, nê merdimê Trumpî, dekewtê zerreyê Meclîsê Temsîlkaranê Yewîya Amerîka. Bê emrê pawitoxey polîsê Eyaletî nişno mudaxeleyê nê hedîseyî bikê. Semedo ke nê îsyankaran Meclîsê Temsîlkaran ra vejîyê; cîranê Washingtonî, Walîyê Marylandî telefonî Wezîrê Pawitoxîyey keno. Wezîrê Pawitoxey, 1.5 seat nêvejîno telefonî ser. Nê îsyankarî, zafê înan biçekanê xo dekewenê Meclîsê Temsîlkaran. Trûmp verî vano ke; “Ma Komarîya xo tepa wazenê. Ez vernîya şima de, ma şonê.” Di seatî dima, nê îsyankaran ra vano ke; “E ya, heqê ma werdo. La ma şiddet nêwazenê, şêrê keyeyê xo. Şima merdimêkê zaf taybet î, ma şima ra zaf heskenê.” Di seatî dima zî vano ke; “Kamo/e ke şiddet kerdo, wa cezayê xo bianco.” Tewr peynî de zî vano ke; “20ê Çeleyî de, ma bi goreyê ûsilî, Serekîya Komare bi toren/merasim teslîm kenê.” Yewîya Amerîka de serekkomar şîyno ef vejo. Tram zî wazeno ke no hedîseyî ra pey, xo rê yew ef vejo. Nê têgeyr û vatişan de tam Trûmpwarî yew vindetiş esto.
Trûmp Serekkomarîye ra kewto. La aseno ke, Trûmp Yewîya Amerîka de, siyaset ra fek verranêdano. La yewna het ra Serekkomar Biden Partîya Demokratan ra yo, zafaneya Meclîsê Temsîlkaran, Partîya Demokratan ra yo. Yewna het ra nêmeyê merdimanê Partîya Cûmhûrîyetîyan, Trûmpî het de hinê ca nêgênê. Merdimê ey yê ke beştarê nê îsyanê bîyê, tek tek yenê tewiştiş/tepîştiş. Eke hetan 20ê Çeleyî biresnê, ko Trûmp zî serekkomarîye ra bêro vistiş.
