Dewa Yarbaşi ya qezaya Pilemurîye ya Dêrsimî de pê bezreyanê herêmîyan berardiş yeno kerdene. Seba berardişî hunermend Metîn Kahraman, Cemxaneyê Yalinca, Akademîya Munzurî û xeylêk berardoxan deweka Xanoyî de xele ramit. Par zî şaristan de hetê Hemleya Anka ya Dêrsimî ra citkaran rê bezreyê herêmîyî ameybî vilakerdene. Hemle heta nika Pêrtag, Mazgêrd, Pulur û Pilemurîye de qasê 250 doniman xele ramit.
Emser rîyê vîrusê Korona ra xeylêk merdimî agêrayî dewan û bi nê hawayî waştişê seba zîretî zêdîya. Hemleya Anka ya Dêrsimî zî xebatê xo kerdî zêdêr. Berardoxê ke deweka Xanoyî de yenê pêser xebata kolektîfe kenê û berdişê tabîyî dewam kenê.
Hasan Alî Duzgunkaya bi serran metropol de ciwîya û dima agêra dewa Kiliçkaya ya Erzînganî. Duzgunkayo ke berardoxanê na xebata kolektîfe ra yew o wina vat: ”Ma do kincanê kapîtalîzmî ra fek vera bidê ô kincanê xo yê raştikên xo rê bidê. Ma pê na xebata komune agêrayî tarîxê xo û ma hînî derheqê parekerdiş, paştdayîş û cuya komunele ser o qisey kenê.”
Serekê Cemxaneyê Yalinca Selçuk Guzel zî tewrê berardişê kolektîfî bîyo. Guzelî vat: ”Ma seba ke cuya tabîye ganî bikerê bîyî meymanê keyeyê Metîn Kahramanî. Ma ci rê berhemê tabîyî ardî. Ma seba ke nê wextê prosesî de paştdayîşê yewbînan xurt bikerê dest pê na xbate kerd. Ma rojêke de resayî 55 dewan û 1307 keyeyan û ma înan rê berhemî dayî. Ma seba ke deynê xo bidê nê erdî gamêke eşte. Seba ke cemxane û dezgehê bînî zî hîsger bibê ma tîya de yê. Ma pê na xebate kenê ke abigêrê eslê xo.”
Sanîye Îldenîza ke Dêrsim de kulturê şîfa dana ciwîyayene zî tewra xebata kolektîfe bena. Îldenîze vat: ”Ma ewro mişagê Metîn Kahramanî yê yanî ma hetkarîya ci kenê. Verê cû zî ma wina kerdêne û qala pereyî zî nêkerdêne. Nika no kultur zî wedarîya. Eke ma miqatê xozaya xo nêvejîyê çew do miqatê ci nêvejîyo. Ma do ney bikerê. Wexto ke virsik eştêne ma zanayêne ke wisa dîyeno û ma xoza rê secde kerdêne. Ma vatêne ‘Ya qismet ê mi erdê Dewreşî yo.’ Ma qismetê xo erdî ra wazenê.” DÊRSIM
