Pîyê hepsîyo ke grevê vêşanîye de yo Hasan Demîrî va: “Beno ke domanê ma yew bi yew cuya xo vindî bikerî. La ma zanê ke do îradeya înan ser bikewo. Senî ke Zîndanê Amedî de xoverdayîşê Mazluman ser kewt, do xoverdayîşê domananê ma zî ser bikewo.”
Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene û bi hezaran hepsîyanê sîyasî ke seba wedarnayîşê tecrîdê serê Rayberê PKKyî Abdullah Ocalanî dayî dest pêkerdene, resa merheleyêko krîtîk. Seba ke hukmat hemverê nê çalakîyan de ti gamêk nêeşto, 15 hepsîyê 30ê Nîsane de 4 zîndananê cîya-cîyanan de dest bi rojeyê merdî kerdî. Bi no hawa çalakîya grevê vêşanîye açarîya rojeyê merdî û resa merheleyêko newe. Keye û merdimê hepsîyan zî kewtî mîyanê hewldayîşan. Keyeyê hepsîyan her ca de vejîyenî raşteyan û benî vengê domananê xo.
Emrecan Demîrî (29) zî nê xoverdayoxanê grevê vêşanîye ra yew o. Keyeyê Demîrî qezaya Mêrgirî ra Dêrsimî de maneno. Demîrî serra 2016î de Antalya de yeno tepiştene û cezaya muebetî ci rê yena dayene. Demîrî 3 serrî yo ke Zîndanê Tîpa Lyî yê Antalya de tewqîfkerde yo. Demîr tewrê 15 embazanê xo 14ê sibate de dest bi grevê vêşanîye kerd. Demîrî de xeylê nêweşîyê cîya-cîyayî estî. Pîyê Demîrî, Hasan Demîrî dîyar kerd ke doktor xoverdayoxan kontrolê nêkeno, lazimîyanê înan yê esasî nînê caardene û zextê psîkolojîk hepsîyans er de yeno kerdene.
Demîrî qiseykerdişê xo de wina va: “AKP herême de polîtîkayê qirkerdiş, zext û şîdetî domneno. Raşteyê xorayîrberdişî de merdim bi ganî ameyî veşênayene. Tirkîye serra 1980î de bi cunta ameyêne îdarekerdene û nika zî tu ferqê Tirkîye aye wextî ra çin a. Şexsê birêz Ocalanî de heme raşteyê cuye yenî tecrîdkerdene. Domanê ma cok ra dest bi grevê vêşanîye kerdî. Ganî sere de Wezîrîya Edaletî û heme selahîyetdarî goş bidî vengê hepsîyan. Domanê ma bi bedenê xo xover danî. Ganî tecrîd wedarîyo. Talebê domananê ma oyo ke dewlete qanûnanê xo caa bîyara. Dewlete mecbura ke gamêk bierza. Zîhniyetê Kenan Evren û Esat Oktay Yildiran hema dewam keno. Wexşetê aye wextî bi xoverdayîşê hepsîyan ame vindetene. Nika ruhê Mazlum, Kemal, Xeyrî, Ferhat û Aliyan zîndanan de ganî bî. Beno ke domanê ma yew bi yew cuya xo vindî bikerî. La ma zanê ke do îradeya înan ser bikewo. Senî ke Zîndanê Amedî de xoverdayîşê Mazluman ser kewt, do xoverdayîşê domananê ma zî ser bikewo.” DÊRSIM
