PKK: Ciwan û cinîyê Kurdî, hemeyê şarê Kurdî do nê ewlad û hemrayanê xo yê ercayeyan rê wayîr bivejîyê û hemleya ma ya azadîye biresnê serkewtişî û heyfê hemrayanê ma yê şehîdan bigîrê. Gerîlayê ma yo qehreman xora her roje heyf gêno.
Komîteya Rayberdişî ya PKKyî da zanayene ke endamê Komîteya Newe ra Awankerdişê PKKyî û yê Konseya Fermandarî ya HPGyî hemra Dogan Zinar Teşrîna peyêne ya 2017î de pîya bi 11 hemrayanê xo Eyaletê Amedî de şehîd kewto û na hayîdarîye hetê Merkezê Îrtîbat û Çapemenî yê HPGyî ra ameya eşkerakerdene û wina va: “Ma şehîd fermandar Dogan Zinarî û 11 hemrayanê partîyîyan ê ke ê dir şehîd kewtê bi hurmet û minet bi vîr anê, soz danê ke ma do amacanê înan berê sere.”
Eşkerayîya PKKyî de nê ameyî vatene:
“Ma dejê keyayanê şehîdan û şarê xo yê ercayeyî pare kenê. Ewladê şarê Botanî yo ercaye hemra Dogan, serra 1991 de tewrê gerîla bîyo û sere de sehaya Botanî hema hema hemeyê wareyanê koyîyan ê Kurdistanî de 25 serrî ra vêşêr gerîlatî kerda. Şerwanî ra heta Fermandarîya Sehaye û endamê Konseya Fermandarîye her derece de gure û mesuldarî girewtê. Nê bingeyî de bîyo şerwano ercaye yê Botanî, fermandarê Kurdistanî û endamê Komîteya Newe ra Awankerdişê PKKyî. Partîya ma û hêzê ma yê gerîlayî do şopa nê fermandarê ma yê ercayeyî de şirê, sere de şarê Botanî do şarê ma yê Kurdistanî nê ewladê xo yê ercayeyî rê wayîr vejîyo, ciwanîya Botan û Kurdistanî biherikîyo ver bi sefanê gerîla, pêro bibê Doganî û dîktatorîya faşîst-qirkerdox ya AKP-MHPyî ra hesabê şehîdanê Kurdistanî biperso.
Hemra Zulkuf Gezen şehîdê yewin ê helme yo
Pîya bi nê, Xoverdayîşê Grevê Vêşanîye yê Pîlî yo ke bi serkêşîya Leyla Guvene 7ê Teşrîna peyêne 2018 ra nata dewam keno şehîdê xo yê yewinî da. Hemra Zulkuf Gezeno ke zîndananê TCyî de 12 serrî yo esîr ameyêne tepiştene, 1ê Adare ra nata grevê vêşanîye de bi, seba ke mucadeleyî hîna aver bero Zîndanê Tekîrdagî de cuya xo rê peynî arde û şehîd bi. Hemra Zulkufo ke şaristano qedîm ê merdimîye Amed-Sûr de ame dinya û bi pîl, emrê ciwanî de tewrê mucadeleyê azadîye bi û her gureyo ke girewt doşanê xo ser bi cesaret û fedakarîyêka pîle rayra berd. Bi şehadetê xo yê 17ê Adare zî bi şehîdo yewin ê zîndanan ê hemleya ‘Ma tecrîdî bişiknê, faşîzmî birijnê û Kurdistanî azad bikerê’ ke seba Rayber Apo bireso cuya azade û şertanê xebate.
Ma do çalakîyanê azadîye her wareyî de aver berê
Nê bingeyî de ma şehîd û hemra Zulkuf Gezenî bi hurmet, heskerdiş û minet bi vîr anê, ma sozê serfînayîşê amacanê ci û ciwînayîşê vîrameyîşê ci yê Kurdistanê azadî newe ra danê. Ma sey Têgêrayîş û şar vanê ke şehadetê hemra Zulkufî ke bi fedekarîyêka pîle xo eşt vernî û bi şehîdê Newroz a 2019î, hemleya ma ya ‘Ma tecrîdî bişiknê, faşîzmî birijnê’ bi hawayêkê qetîyî resnaya serkewtişî. Sere de şarê Amedî ma veng danê heme şarê Kurdistanî ke hemra û şehîd Zulkufî rê wayîr vejîyo, serê pirdo ke ê awan kerda ra bi qerardarîye şirê û çalakîyanê azadîye her wareyî de xurt bikerê.
Ma do şopa hemra Zulkufî de tecrîdî bişiknî
Ganî no zaf rind bêro zanayene ke cuya rastekîne şehîdê ma bi xo yê. Nika ma do zî şopa gerîlayê ma yê qehremanî û yê Şehîd û Hemra Zulkufî de rayra şirê, tecrîdî bişiknê, faşîzmî birijnê, Kurdistanî azad bikerê, Tirkîya û Rojakewtena Mîyanêne zî bikerê demokratîk. Ma do bi nê mucadeleyê qehremankîyî yê serê xeta şehadetî de îmkan virazê ke Rayber Apo bireso cuya azade û şertanê xebate.
Birastî hemra Zulkufî oyo zor berd sere. Ê rayîro rast ke ganî ma ser o şirê ramot ma û rayraşîyayîşê serkewtişî kerd qetî. Hemra Zulkuf bi rayraşîyayîşê heta serkewtişî ters bin fîna, raste ra wedart. Hendî cinî-camêrd hemeyê şarê Kurdî û ciwanîya ci do bi cesaret û fedakarîyêka pîle mucadele bikero, qatilan ê faşîstan ra hesab biperso. Xetêka çalakîye ya ke dana xo ro nê, dana faşîzmê AKP-MHPyî ro xo rê esas bigêro, do bi hawayêkê qetîyî zîhnîyet û sîyasetê faşîst-qirkerdoxî tarîx de war kero.
Do heyfê embazanê ma yê şehîdan bêro girewtene
Zaf eşkera yo ke ciwan û cinîyê Kurdî, hemeyê şarê Kurdî do nê ewlad û hemrayanê xo yê ercayeyan rê wayîr vejîyo û bi serfînayîşê hemleya ma ya azadîye heyfê şehîdan ê hemrayanê ma bigêro. Gerîlayê ma yê qehremanî xora her roje derbeyanê kiştoxan dano dişmenê faşîst-qirkerdoxî ro û heyfo ke qalê ci yeno kerdene gêno. Birastî zî hêzanê HPGyî yê Xakûrkê roja 16ê Adare derbeyêka kiştoxe daya garananê AKP-MHPyî yê faşîstan ro. Ma seba na serfirazîya înan a pîle heme hêzanê fermandarî û şerwanî yê HPGyî pîroz kenê, şerê înan ê azadîye de dewamê serfirazîyanê înan wazenê. Ma şehîdanê na çalakîya tarîxîye bi hurmet û minet bi vîr anê. Serê nê bingeyan de Roşanê Newroze yê Azadîye yê heme hêzanê partî û gerîlayanê ma, şarê ma û dostanê ma pîroz kenê, veng danê ke wa biherikîyê meydananê Newroze û Newroza serra 2019î bikerê Newroza Şikitişê Tecrîdî û Rijnayîşê Faşîzmî!” BEHDÎNAN
