Komîteya Rayberdişî ya PKKyî pare kerd ke endamê Komîteya Merkezî Kasim Engîn hêrişê hewayî yê 27ê gulane de şehîd bi. Komîteya Rayberdişî ya PKKyî derheqê şehadetê Kasim Engînî de eşkerayîyêke daye. Eşkerayîya Komîte wina ya:
”Milîtanêko ercîyaye, fermandar, îdarekarê partîya ma, endamê Komîteya Merkezî ya PKKyî embaz Kasim ENGÎN (Îsmaîl Nazlikul) 27ê gulane de hêrişê hewayî yê dewleta tirke ya faşîste de warê Biradostî yê Herêmanê Pawitişî yê Medya de şehîd bi. Pê na wesîle ma keyeyê ci yê ercîyaye rê, partîya xo û şarê Kurdistanî yê welatperwerî rê serweşîye wazenê. Ma qerardarîya xo reyna anê ziwan ke ma do xeta Rayber Apoyî de têkoşîn ser bikerê.
Partîya ma PKKyo ke sey partîya şehîdan yena naskerdene, Hakî Karerî ra heta bi des hezaran şehîdan û pê şehadetê Kasim Engînî do biba pîlêr, xurtêr û dewaya azadîye ya şarê ma do ser bikera.
Seba ke keyeyê Nazlikulî wextê awanbîyayîşê partîye de xo resna partîye embaz Kasimî qijkekîya xo de partîye nas kerde û serra 1985î de pê na berpirsîyarîye werişt payan ser. Embaz Kasim serra 1989î de bi hawayêkê profesyonelî tewrê PKK bi. Ewropa de tewrê karanê ciwanan, kultur û hunerî, dîplomasî bi. Serra 1990î de seba ke derbazê warê Rojhelatê Mîyanênî bibo û Rayber Apo nas bikero israr kerd û heman serre Lubnan de tewrê Akademîya Mahsun Korkmazî bi. Embaz Kasimî perwerdeyê xo temam kerd, Rayber Apo nas kerd û Eyaletê Başûrrojawanî de dest pê gerîlatîye kerd. Serran ra dima zî sey fermandar agêra warê xo ke tede bi pîl.
Embaz Kasim serra 1994î de perwerdeyî ra dima Botan de dest pê wezîfeyî kerd.Embaz Kasim wexto ke derbazê Başûrê Kurdistanî bi Biradost û Qendîl de şer kerd. Wextêkê dergî Merkezê Îrtîbatî û Çapemenîye yê HPGyî de berpirsîyar bi. Embaz Kasim wezîfeyê xo yê Komîteya Paştdayîşê Keyeyanê Şehîdan ê PKKyî bi serkewtişî ard ca.
Embaz Kasimî serranê dergan koyanê Kurdistanî de gerîlatîye kerde û tim paradîgmaya Rayberîye, felsefeya Rayber Apoyî partîye de vila kerdêne, dayêne famkerdene. Embaz Kasimî karê çapemenîye, weşan û açernayîşan de kedêka pîle daye. Embaz Kasimî giranîye dayêne îdeolojîya Rayber Apoyî ser. Tim xîret kerdêne ke tarîxê Kurdistanî fam bikero û raşt şirove bikero. Kitabê ci yê derheqê na babete de yê bi nameyê ”Tarîx Nika yo” coka zaf girîng o.
Embaz Kasim têkoşînê xo yê 35 serran de seba ke bibo milîtanêko raştikên ê Rayber Apoyî şewe û roje xebitîyayêne û xo nê esasî ser o perwerde kerdêne. Embaz Kasimî zanayêne ke tewrbîyayîşê PKKyî yeno manaya tewrbîyayîşê Rayberîye. Ey her tim no çi ardêne ziwan: ”Xoverdayîş û têkoşînî ra berî rayîrêkê ma çin o. Dişmenê ma dewirê qelsî de yê. Eke ma têna têkoşînêkê raştî bikerê ma do ser bikewê.”
Hayîya ma pê esta partîya ma PKK yena manaya perwerîya şehîdan. Nê esasî ser o embaz Kasim do her hetê têkoşînê ma de do biciwîyo û bibo wesîleya ke xeta Rayber Apoyî de ma do serfîrazî xurtêr bikerê.
Şexsê embaz Kasimî de ma sozê xo yê seba şehîdan dibare kenê ke ma do erjanê xoverdayîşê înan û serfîrazî pîl bikerê. No sîyaseto qirkerd û kolonyalîst vera şar û têgêrayîşê ma do çin bibo. Rejîmo faşîst têkoşînê bêmabênî yê PKK û şarê kurdî de peynîya xo vîneno. Coka hêrişê Herêmanê Pawitişî yê Medya keno. Vera nê hêrişan cinî û ciwanê kurdî PKK kenê pîlêr. Heta ke faşîzm çin bibo û têgêrayîşê ma ser bikewo têkoşînê ma do dewam bikero.
Endamêko ercîyaye yê şarê Kurdistanî şehîd bi. Ma zananê ke senî ke ciwananê Kurdistanî şehadetê Engîn Sîncerî kerd artêşa Erdalan, ê do şehadetê Kasim Engînî zî bikerê ruh û coşê cewabêkî û artêşa tirke ya barbare poşman bikerê.
Ma reyna sere de keyeyê Nazlikulî rê, pêro şarê Kurdistanî rê û merdimîya xoverdayoxe rê serweşîye wazenê. Ma sozê xo dibare kenê ke ma do pêro Kurdistan û Tirkîya, pêro koy, şaristan, kuçe, kargehanê dişmenan bikerê warê qesasî yê pêro şehîdan.” BEHDÎNAN
