Komîteya Rayberdişî ya PKKyî bi eşkerayîyêke Roşanê Karkeran ê 1ê Gulane fîraz kerd.
Eşkerayîye wina ya:
”Ma kewenê 1ê Gulane ke roja yewî, paştdayîş û têkoşînê karkeran a. Ma sey têgêrayîşê azadîye 1ê Gulane bi Hemleya Azadîye yo Globale pêşwazî kenê. Hemleya Azadîye venga pêro karker û kedkaranê dinya, pêro sosyalîst û demokratîkan dana ke tewrê ci bibê. Ma pê bawer ê ke bi çalakîyanê 1ê Gulane Hemleya Azadîye ya Globale do xurtêr biba û vilaya her cayî biba.
Nê esasî ser o ma 1ê Gulane yê Rayber Apoyî, embazanê xo, şarê xo, dostanê xo û karkeran fîraz kenê. Ma têkoşîn de her kesî rê serkewtiş wazenê. Şexsê şehîdanê ma yê 1ê Gulane Abdulkadîr Çûbûkçû, Ramazan Kaplan û Mehmet Emîn Aslan û şehîdanê 1ê Gulana 1977î de ma pêro şehîdan bi rêz û minetî yad kenê. Ma venga şarê xo û dostanê xo danê ke 1ê Gulane de kuçe û waran debikewê û Hemleya Azadîye ya Globale biresnê leweyêkê neweyî.
Eşkera yo ke 8ê Adare û Newroze ra dima îmkanêko pîl ame afernayene ke 1ê Gulane de yewî, paştdayîş û têkoşînê karkeran Hemleya Azadîye ser bivisnê. Coka ganî şar û dostê ma bi hawayêkê aktîfî beşdarê çalakîyanê 1ê Gulane bibê. Ganî cinî ciwanî, kurdê zanayeyî zî 1ê Gulane bivurnê Newroze.
Kurdîstan û cayanê bînan ê dinya de her wextî ra zêdeyêr ganî 1ê Gulane bi manaya xo bêro pêşwazîkerdene. Yewî, paştdayîş û têkoşînê karkeran ancax bi rêxistinî û zanayîşî yenê caardene. Sîstemo kapîtalîst her wextî ra zafêr qels bîyo. La serkêşê nê sîstemî gêrenê şer û kaosanê neweyan. Bi têkoşînê azadî, têdûştî û demokrasîyî merdimatîye do cuyêka azade û îdareyêkê demokratîkî bivisnê destî. Naye ra 1ê Gulane hêzê îlhamî û sembolê têkoşînî yo.
Rayber Apoyî bi paradîgmaya xo ya Modernîteya Demokratîke manaya 1ê Gulane geş kerde û zanistê sosyalîzmî aver berd. Coka wayîrvejîyayîşê keda Rayber Apoyî girîng o. Erkê her kesî yo bingeyî yo ke meydananê 1ê Gulane de azadîya Rayber Apoyî biwazo.
Ewro şarê kurdî her ca de payan ser de yo û Kurdîstan bîyo kelaya şorişê azadîye. Cinîyê kurdî serkêşîyê şorişî kenê. Cesaretê ciwananê kurdan îlham dano. Têkoşînê şarê kurdî yê vera hêrişanê îşxalî yê dewleta tirke sey têkoşînêkê fîrazî hetê bindestan ra yeno qebulkerdene. Operasyonanê Şorişgêran ê gerîlayan derbê giranî dayî artêşa tirke ya îşxalkere ro. Xoverdayîşê çapemenîya azade ya kurdan hêvî û îradeyê azadîye xurtêr kenê. Bi mojnayîşê zûranê AKP-MHPyî yê faşîstî Kurdîstan vurîyo kelaya têkoşînê azadîye.
Nê prosesî de zî modernîteya kapîtalîste û domanê ci AKP-MHPyî hêrişanê xo rê dewam kenê. Hetêk de Metîna de hêrişê îşxalî hetê bînî de teda û terorê vera çapemenîya azade dwam kenê. Hêrişê dewleta Belçîka yê vera televîzyonanê kurdan planêkê nê hêrişan bi. La têgêrayîşê ma û şarê ma bi ruhê xoverdayîşê Îmraliyî û Zapî xo ver danê û qetî do ser bikewê.
Nê esasî ser o ma anxî xoverdayîşê gerîlayan ê Metîna û çapemenîya azade selam kenê. Ma venga pêro şarê xo danê ke bi aktîfî tewrê çalakîyanê 1ê Gulane bibo û nînan rê serkêşîye bikero! Bijî 1’ê Gulanê! Bijî sosyalîzma demokratîk a zanistî!”
